Sveitapían

Kennarinn í sumarfríi ;)

2009-06-15T13:42:00.000-07:00

Afsakið blogg-letina, hef einfaldlega ekki nennt að blogga lengi vel. Kannski það sé facebook að kenna, nú er maður í sambandi við alla þar.
Nú er maður kominn í sumarfrí og líkar það VEL!! Veðrið hér á Hornafirði hefur líka verið sérstaklega gott og alls ekki svo mikið rok, sem telst til frétta á þessum líka ágæta stað. Stelpurnar mínar fara í sumarfrí í júlí og því er ég í eins konar orlofi. Eins mikið og heitt ég elska mínar dætur, þá finnst mér svona frí samt mjög næs. Hef þó ekki setið aðgerðalaus, ónei, ekki eins og ég hangi yfir imbanum og leiki mér í tölvunni allan daginn. Hér er sko unnið hörðum höndum við það að fækka beðum í garðinum og reyta þau sem eftir eru, sem eru samt nokkuð mörg þrátt þrátt fyrir skerðinguna. Dagurinn hefst samt á skokki og sundi eða annað hvort, sem mér finnast mikil forréttindi og lúxuslíf. Síðan á að taka framhlið hússins aðeins í gegn, svalirnar orðnar ansi ljótar, en annars á að njóta lífsins í sumar á Fróni, enda ekki hægt að fara í frí út fyrir landsteinana þetta árið. Dagmar Lilju var boðið af ömmu sinni og afa að skreppa til Noregs í ágúst, svo hún verður sú eina í familíunni sem fer í dýragarð og á ströndina þetta árið. Það verður mikið stuð, því þar búa auðvitað Saga og Baltasar, frændsystkin hennar.

Annars verður eitt og annað um að vera í sumar, s.s. eitt stk. ættarmót og útilegur, og síðan er komið að hinni laaaaangþráðu útskrift minni úr HÍ-Menntavísindasviði (Kennó:) núna á laugardaginn. Sökum fjarveru frá börnum um síðastliðna helgi þar sem við hjónin skruppum með saumaklúbbnum og mökum í frábæra fjallgöngu, grill, djamm og gistingu, þá ætlum við að fagna þessum áfanga hér heima í faðmi fjölskyldunnar og grilla eitthvað gómsætt!

Þangað til næst, sem ég þori nú ekki alveg að fara með hvenær verður nákvæmlega... góðar sólar- og grillstundir!!!
Íris....endelig en lærer om 5 dage;)

Hvannadalshnjúkur....eða ekki?!

2009-03-04T12:18:00.000-08:00

Líkurnar á því að ég gangi á hnjúkinn minnka með hverjum deginum sem líður. Ég sem var orðin frekar spennt fyrir þessum merka áfanga, sem er frekar ótrúlegt þar sem ég er ekki mikið fyrir svona labb. Það er nefnilega alltaf þannig að þegar það er janúar og febrúar þá finnst manni alltaf svo langt þangað til að e-ð gerist og fer að plana hitt og þetta. En svo líður tíminn alltaf eins og raketta og gangan eftir tæpa 2 mánuði og líka skil á lokaverkefninu. Ef ég á að meika það upp þessa 2000 rúml. metra þá verð ég líka að taka góðar æfingar annað veifið upp um fjöll og firnindi. Staðreyndin er hins vegar sú að lokaverkefnið mun taka allar þær stundir sem eiga að heita "frí", þannig að ég ákvað að vera raunsæ og fresta þessu um óákveðinn tíma. Ég veit að það verður lítið mál að fá hann Óskar minn með mér einhvern tímann seinna. En ég viðurkenni það að ég mun verða frekar spæld þann 25. apríl þegar allur hópurinn fer upp......nema ég....:( Hlynur fer bara í staðin fyrir mig og tekur flottar myndir til að sýna mér...jájá

Ég sleppi samt ekki blakinu, sem mér finnst mjög skemmtilegt og góður félagsskapur. Þegar mæting er hvað best erum við í kringum 20 kellur, sem er nú helv... gott. Ég lét meira að segja plata mig austur á Neskaupsstað um helgina á e-ð blakmót....dísös kræst! En hei... þetta er í alvöru spurning um að vera með :):) Er í B liðinu svo það sé alveg á hreinu! Go Íris go Íris !!! Takk fyrir það :)

Annars er bara allt í gúddí fíling hérna á bæ fyrir utan smá veikindi hjá þeirri yngstu á bænum, en það er nú bara þannig þegar maður á börn. Hún er frekar mikil mömmustelpa og t.d. þegar Óskar kom heim eftir vinnu seinnipartinn þá var hún ekki á því að far að kubba með pabba sínum á meðan mamma hrærði í grautnum, alveg brjáluð. Síðan datt mér eitt í hug sem skiptir hana afar miklu máli þessa dagana, en það er að "stjórna". Ég sagði að hún mætti stjórna á meðan þau kubbuðu og þá bara "já"!! Þetta er s.s. the secret word þessa dagana...

Over and out!
Íris í keppnisskapi

Ekki beint tíðindalítill dagur..

2009-02-18T13:26:00.000-08:00

Það er ótrúlegt hvað lítið er að frétta svona almennt. Síðan koma tímabil þar sem allt er að gerast og þannig hefur vikan verið, og það er nú bara miðvikudagur. Á mánudaginn eignuðust Halla Katrín frænka og Gunnar frumburðinn, yndislegan dreng og óska ég þeim innilega til hamingju með það, þó að ég efi nú að þau hafi tíma til að líta af drengnum til þess að lesa þetta blessaða blogg mitt.
Síðan frétti ég í dag að vinir okkar Óskars hafi eignast stúlku nr. 2 (hjá þeim) nr. 3 (hjá honum) nema hvað að greyið pabbinn var í Köben og missti af fæðingu dóttur sinnar. Hún átti ekki að fæðast fyrr en eftir um 10-14 daga, en svona er náttúran. Frétti að hann hafi fengið sér einn öl á krá til að róa taugarnar og að mikil gleði hafi breiðst út meðal gesta þegar barþjónninn náði að veiða upp úr föðurnum hvernig staðan var. Gaman að því þó að hann hafi eflaust viljað vera í faðmi fjölskyldunnar. Til hamingju elsku Daði, Herborg, Rebekka og Mía.
Mamma hringdi í dag og sagði mér síðan fréttir sem ég átti langt frá því von á, en hún Anna Marín frænka mín er gift!!!!!! Ekkert að því auðvitað, nema bara að hvorki ég né aðrir í familíunni hafa séð eða hitt eiginmann hennar og hún hefur ekki hitt tengdó. Smabandið hefur staðið stutt yfir en þau hafa þekkst nokkuð lengi. Hahahaha...svona er ástin og ég samgleðst henni innilega. Anna Marín er yndisleg manneskja og á skilið allt það besta. Knús Anna mín!!
Held ég fái mér bara einn öl og melti fréttir þessara þriggja daga. Börn og ástin..hvað er mikilvægara!!! Ekkert...
Over and out!

Harkan...svitni svitni

2009-02-11T12:40:00.001-08:00

Já árið byrjar með látum. Ákvað að hætta þessu drolli og drífa mig í blakið.....aftur....þar sem ég þarf svo voðalega lítið að læra núna. Veit samt ekki alveg hvort ég mun segja það sama þegar líður að skilum lokaverkefnis...en er á meðan er! Ætla meira að segja að fjárfesta í hnéhlífum svo ég geti fórnað mér fyrir liðsmenn mína fyrir alvöru :) Svo dreif ég mig í að kaupa eitt stk. kort í ræktina...takk fyrir og góðan daginn...og er bara búin að vera nokkuð öflug þó ég segi sjálf frá. Það er nefnilega þannig að stefnan er sett á Hvannadalshnjúk á sjálfan kosningadaginn 25. apríl. Ég hugsaði með mér að annað hvort sleppti ég þessu bara eða tæki ákvörðun um að fara og láta slag standa og koma mér í þokkalegt form, því það er ekki séns á að ég verði í afturdragi 15 samferðamanna..."bíðið eftir mér!!" No way!
Það er svo merkilegt að þrátt fyrir að rúm 2 ár séu liðin frá fæðingu Elínar Óskar þá er þetta bölvaða "spik" ennþá til staðar. Reyndar var ég mjög dugleg hvað mataræði varðar á þeirri meðgöngu en tók Dagmarar með trompi svo ekki sé meira sagt. Þá vantaði mann reynsluna og hélt bara að nú gæti maður sko bara étið kleinur og kex eins og mann lysti, því maður myndi hvort sem er blása út. Ekki grunaði mig að ég myndi enda svo með þessi kíló sem áttu að vera barnið og legvatnið EINGÖNGU, eftir að barnið var fætt. Svo nær maður ekki að koma sér í form áður en næsta meðganga hefst, þannig að nú er bara harkan og hananú! Nú er þetta orðið opinbert og eins gott að ég standi við þessi orð mín.
Annars er allt við sinn vanagang held ég nú bara, sem mér finnst nú bara alls ekki svo slæmt. Hlynur bróðir er í DK (reyndar skrapp til Gumma í Sverige í smá heimsókn) en þar er hann í viðtölum og þreytir hin ýmsu próf til þess vonandi að komast inn í "The national filmschool of Denmark" held ég hann heiti örugglega. Hann er kominn í lotu 2 þannig að nú er bara að krossa fingur því aðeins 6 manns komast inn í þá deild sem hann óskar...... annað hvert ár. En ég hef fulla trú á honum! GO HLYNUR!!!
Jæja best að láta þessu lokið að sinni. Góðar stundir!
Íris

Árið!

2009-01-21T01:05:00.001-08:00

Já, ekki nema um mánuður síðan síðasta blogg var birt. Ég stend mig gríðarlega vel :) Kannski að ég hafi ekki þessa miklu þörf fyrir að tjá mig á bloggi. Það er kannski ekkert óeðlilegt miðað við að í starfi mínu tala ég frekar mikið og svo er ég í einum "föndurklúbbi", einum saumó og einum vínklúbbi...og þið sem kannist við slíkar samkomur vitið að þar eru bara málin rædd og etið þess á milli. Þannig að mér þykir ekki ólíklegt að ég leggi þessa bloggsíðu mína niður á árinu.

En, já nýtt ár er hafið, Elín Ósk orðin 2. ára og Dagmar byrjar í skóla í haust og þá er ég loksins búin með minn skóla, a.m.k. í bili. Það verður sko fagnað þá!! Vinna að lokaverkefni er hafin og er um rannsókn að ræða, þar sem við könnum hversu mikið danskan er í raun töluð í kennslustundum...það er eitt að segjast gera það og annað að framkvæma það síðan. Þetta er efni sem við vitum að leiðsögukennari okkar hefur mikinn áhuga á, því við ætluðum að gera allt annað. Þá er bara að drífa þetta af stað svo ritgerðin verði tilbúin 14. apríl!

Jólafríið var frábært og sérstaklega langt eitthvað núna fannst mér. Ég náði að klára "Mænd som hader kvinder", eftir Stieg Larsson sem var frábær og er byrjuð á bók 2 í þessari trílógíu en hún heitir "Pigen der legede med ilden" og er held ég enn betri en sú fyrsta. Ég elska að lesa svona góðar bækur og ekki spillir fyrir þegar þær eru um 500-600 bls að lengd. Það sorglega er að það er einungis ein eftir, sem segir sig sjálft þegar um trílógíu er að ræða, og enn verra að höfundurinn er ekki lengur á meðal oss. Hann lést áður en bækurnar komu út og náði því aldrei að upplifa þessar gríðarlegu vinsældir, né taka á móti öllum viðurkenningum sem bækur hans hafa hlotið. Skoðið því þessar bækur, mér finnst íslenskir krimmar fölna við samanburðinn!

Það er mikil tilhlökkun til næstu helgar, en þá er komið að Þorrablóti. Við Óskar fórum í fyrsta sinn í fyrra og skemmtum okkur mjög vel, nema að hljómsveitin var vægast sagt léleg. En nú er annað band sem mun sjá um "swingið" og því ekki að óttast að við munum deyja úr leiðindum.

Jæja, læt kannski heyra í mér aftur innan ????xxxx best að segja sem minnst um það.

Kveðja úr kotinu!

Jólakveðja

2008-12-23T03:27:00.000-08:00

Þegar litið er út um gluggann nú á Þorláksmessu mætti ætla að það væri 23. september en ekki desember. Það er rok og rigningin hefur séð til þess að ekki er eitt einasta snjókorn eftir. En sem betur fer hef ég verið að baka og skreyta og um leið hlustað á alíslensk jólalög sem koma mér alltaf í gott skap. Kannski að ég átti mig á því að jólin eru að koma þegar við förum í Nettó og verslum inn. Það er alltaf stemmning í búðinni og hellingur af fólki og allir í góðu skapi. Helga Dís og Co eru komin frá Osló og við eyðum aðfangadegi með þeim og tengdó á Silfurbrautinni, sem er eftir þvílíkar breytingar orðið eins og glænýtt hús. Síðan snæðum við hangikjöt á jóladag í faðmi mömmu og pabba, Hlyns, Hildar og Ídu Mekkínar, Ibbu, Haffa og Sigurðar Pálma.

Ég kem með áramótapistil þegar nær dregur gamlársdag. Þangað til vil ég óska ykkur öllum sem nenna að kíkja á þessa ekki mjög virku síðu mína, gleðilegra jóla í faðmi fjölskyldu og vina og heillaríks komandi árs.
Bestu jólakveðjur,
Íris

Jííiíííha!!!

2008-12-12T13:24:00.000-08:00

Var svo gott sem í skrifuðum orðum að skila af mér síðasta verkefni annarinnar...þvílíkur léttir. Nú get ég farið að jólast, baka og skreyta...næs næs næs! Þá er það "bara" lokaverkefnið eftir og útskrift í vor....LOKSINS..mér finnst ég vera búin að vera endalaust lengi í Kennó og satt að segja er ég komin með nóg.
Á morgun verður mikil veisla og gleði í kofanum. Veiðiklúbburinn "Von bráðar" mun bjóða mökum upp á rjúpu, gæs og annað góðgæti. Miðað við alla Gestgjafana sem þeir skoðuðu og heitin á hinu og þessu, þá lofar kvöldið mjög mjög góðu.
Fengum málverk lánað heim frá honum Hlynsa snillingi sem mér finnst ólíklegt að hann fái nokkurntíman aftur....fittar fullkomlega hingað inn..verðið bara að koma og skoða :)
Jæja ég er búin að vera svo mikið í tölvunni undanfarið að ég er komin með ógeð.
Hafið það gott og farið ekki yfirum við undirbúning jólanna...njótið hans!! Hlakka svo til að grípa loksins í "Mænd som hader kvinder", stelast í konfektmola, smákökur og jólablandið...ahhhh..namminamminamm..
Íris með bros allan hringinn:):):)

Veislur & eyrnalokkar

2008-11-17T12:16:00.000-08:00

Já það er stór helgi framundan, eða öllu heldur helgar. Á laugardaginn n.k. verða litlu krúttin þeirra Hlyns & Hildar og Ibbu & Haffa skírð. Það ríkir mikil tilhlökkun og það verður gaman að eiga góðan dag með fjölskyldu og vinum. Ég er sérstaklega stolt yfir því að hafa verið boðið það skemmtilega hlutverk að vera guðmóðir lillu Hlynsdóttur og auðvitað tek ég það hlutverk alvarlega og geri mitt allra besta til að standa mig!!
Svo er "unglingurinn" á heimilinu að verða 5 ára, ójá! Hún er búin að bíða eftir því mjög mjög lengi. Það er nú ókosturinn við það að eiga afmæli seint á árinu, að maður þarf að bíða svolítið lengi og fara í mörg afmæli vina sinna áður en það loksins kemur að manni sjálfum. Vegna veisluhalda næstu helgi þá munum við halda upp á áfangann þarnæstu helgi. Unglingurinn bað um að fá göt í eyrun, sem hún fékk leyfi fyrir. Nú er hárið alltaf bakvið eyrun svo herlegheitin, "gulleyrnalokkar með bleikum demöntum", sjáist nú örugglega. Dagmar stóð sig eins og hetja og gaf ekki frá sér eitt einasta hljóð, þvílíkt dugleg. Svo sögðu mér leikskólakennarar í dag að ein skottan í skólanum væri bara með einn eyrnalokk, því þegar hún fann hve vont þetta var þá snarhætti hún við...hehe. Ég man bara að ég fékk mín göt á Akureyri og ég var nýorðin 6 ára. Það situr nú ekki í minningunni hvort ég hafi staðið mig jafn vel og dóttir mín...en ég held að mér hafi fundist þetta frekar vont. Best að vera ekkert að spyrja mömmu!

Annars er allt gott að frétta úr vinnunni og skólanum. Skólaárinu hér, og víða annarsstaðar, er skipt í þrjár annir og eru fyrri annarskil nýafstaðin með foreldraviðtölum og einkunnagjöf. Mér fannst mjög skemmtilegt loksins að sjá hvaða fólk á "börnin" mín og að spjalla aðeins. En þó að dagurinn hafi gengið áfallalaust fyrir sig og var eingöngu ánægjulegur, þá leið mér nú samt eins og ég hafi losnað við 100 kíló af herðum mér, eða sama tilfinning og þegar ég er búin í prófi...sem gekk vel auðvitað.

Jæja, hún Elín mín kallar á mömmu sína....en alveg frá því ég kom frá RVK úr staðlotunni er sú stutta mömmusjúk og ég þarf að gera allt...."etti babbi!"

Heyrumst!
Kv. Íris

Jólin koma...en ekki í nóvember!

2008-11-03T14:44:00.001-08:00

Aldrei þessu vant fékk ég gríðarlega löngun til þess að fara út að skokka í gær. Líklega hafði afmælisveisla og kökuát sem henni fylgdi fyrr um daginn áhrif á þessa ákvörðun, en góð var hún engu að síður...bæði afmælisveislan og ákvörðunin. Ég rak upp stór augu þegar ég sá að í einu húsanna í götu einni hér í bæ var búið að setja upp jólaskraut. Uhhhh...er ekki örugglega bara nóvember og það bara 2. nóvember? Ég held að ég gæti ekki haft allt þetta jóladót hangandi úti um allt í svona langan tíma, þá færi ég ekkert í fílinginn. Er eitthvað varið í að hafa skreytt í 2 mánuði? Þegar aðventan hefst, þá finnst mér í lagi að fara í skúrinn og draga fram jóladótið, helst ekki fyrr.

En eftir skokkið hef ég komist að því að mig vantar nýja hlaupaskó. Þessir frekar nýlegu skór meiða mig í hvert skipti. Hef nú þegar misst nögl af annarri stórutánni vegna skónna og fengið a.m.k. þrisvar blöðrur á hælana. Spurning um að punga út í nýja...held það bara.

Skrapp suður um daginn í tæpar 2 vikur í vettvangsnám. Það var ansi gott og gagnlegt. Var hjá frábærri danskri konu sem kennir nemendum í 9. og 10. bekkjum dönsku auðvitað. Þessi umrædda kona talar litla íslensku, enda búið hér í stuttan tíma og því sá ég hvernig kennsla gengur fyrir sig þegar danska er ALLTAF töluð. Fyrir vikið verða nemendur einfaldlega að taka betur eftir og hlusta ef þeir eiga að skilja fyrirmælin og auðvitað fá þeir heilmikinn orðaforða og góða þjálfun í að hlusta og síðan að skilja málið. Ég kom því tvíefld tilbaka í vinnu með þetta markmið og fleiri skemmtilegheit í farteskinu. Reyndar runnu tvær grímur á blessaða nemendur mína við þessar fréttir...en hey...það er vont en það venst. Þetta er þeirra hagur...en þau skilja það kannski ekki fyrr en seinna :)

Þar sem ég er svo hrikalega dönsk þá þurftu frændsystkini mín, Ellert og Anna Marín, ekki að tuða lengi í mér til að fá mig út eitt kvöldið og hitta hina heimsfrægu trúða Frank og Casper, sem þau hafa kynnst nokkuð vel. Nú eins og sannir aðdáendur gera þegar þeir hitta ídólin sín þá smellti Anna Marín mynd af okkur "félögunum". Við Óskar fórum á youtube í gærkvöldi og fundum nokkur brot úr Klovn og ég get svarið fyrir að það að við grenjuðum úr hlátri. Þeir koma manni kannski ekki í jólaskapið en a.m.k. í mjög mjög gott skap!!

På gensyn!

Ég er hér..

2008-09-25T13:47:00.000-07:00

Já ég veit eiginlega ekki hvers vegna í ósköpunum ég er að rembast við að blogga. Þegar maður er að kenna og í kennaranámi þá er einhvernveginn voðalega lítið spennandi að gerast. Þar fyrir utan hefur maður svo afskaplega lítinn tíma til að sinna hinum ýmsu áhugamálum....hvaða áhugamál svo sem það eru??"!" Ég hafði nú oft heyrt hvað kennarastarfið væri nú mikil vinna og svona en bjóst svo sem ekki við að það væri meira en gengur og gerist hjá öðru fólki í öðrum störfum. Við skulum bara orða þetta svona....vona að þetta sé bara svona fyrsta árið. Það er ótrúlega tímafrekt að koma sér upp sínum "kennslupakka", búa til sín eigin námsmatstæki og átta sig á hvað sé í boði fyrir krakkana. En ég er ekki að kvarta...kannski kvartar Óskar bráðum á blogginu hans....en mér finnst þetta mjög gaman og ég hlakka bara til að takast á við vinnudaginn.

Ég gaf mér þó tíma til að skreppa á tónleika fyrir tæpri viku síðan. Friðrik Ómar tók rúnt um Suður?land...Austur?land..Suð-austurland? allavega firðina og kom síðan við hér. Prógrammið hans eru lög Vilhjálms Vilhjálmssonar ásamt nokkrum öðrum perlum við undirleik Grétars Örvarssonar. Tónleikarnir voru haldnir í Hafnarkirkju og plataði ég Kollu og Sonju með mér. Og svona af því við vorum í guðs húsi, þá verð ég bara að segja "Guð minn góður hvað var gaman". Þessi ungi drengur hefur ekkert eðlilega fallega rödd. Það er eins og hann hafi ekkert fyrir þessu. Hann söng í 1 og 1/2 tíma svo gott sem non stop og rabbaði aðeins á milli laga sem var þrælskemmtilegt. Það myndaðist svo skemmtileg stemning og gott andrúmsloft. Þegar maður er svona nálægt söngvaranum þá er eins og hann sé bara kominn inn í stofu. En já sem sagt hrikalega gaman og ég var lengi að ná mér niður, enda ekki til fallegri lög í heiminum en þau sem VV söng i den.

Nú langar mig bara á fleiri tónleika...plíís vill einhver koma á Höfn?

KV, Íris

Rhodos, hversdagurinn og glæný frænka!!

2008-08-22T15:35:00.000-07:00

Ég við byrja þennan pistil á því að monta mig aðeins, því í morgun eignaðist ég frænku. Hlynur og Hildur eru orðin stoltir foreldrar og ég samgleðst þeim innilega. Mikið hlakka ég til að knúsa hana og finna ilminn af henni....en ungabarnsilmur er besti ilmur í öllum heiminum! 15,5 merkur og 52 cm. Hlynur ætlaði að skella inn myndum á morgun á bloggið sitt, en linkinn sjáiði hér til hliðar.

En eins og dyggir bloggaðdáendur mínir ;) hafa tekið eftir er ég ekkert sérstaklega iðin við það að blogga. Nennti því ekki í fyrstu, síðan setti ég inn svakalegan pistil og fullt af myndum, sem á einhvern óskiljanlegan hátt klúðraðist. Eftir svoleiðis leiðindi er maður lengi að koma sér í gírinn aftur. Síðan þá er búið að vera nóg að gera....en byrjum á Rhodos:

VÁ hvað það var frábær ferð í alla staði. Við hjónin vorum eins og lufsur í hitanum og aðgerðaleysinu. Mikið svakalega var gott að fá sér einn síestublund um miðjan dag, sötra mojito á kvöldin og liggja í sólbaði þess á milli. Við höfðum okkur nú samt af stað í tvær skipulagðar ferðir, annarsvegar um miðborg Rhodos og hinsvegar til smábæjarins Lindos. Í 35 stiga hita (lágmark) gengum við upp 300 tröppur til að berja leifar Aþenuhofsins augum og á toppnum var ekkert venjulega fallegt útsýni yfir Lindos. Hótelið var meiriháttar flott, maturinn góður og loftræstingin, sem er afar nauðsynlegt auðvitað, og fólkið vingjarnlegt. Það eina sem var ekkert sérstaklega vingjarnlegt var verðið....allt genginu að kenna! En þarna hlóðum við batteríin og vorum ansi lengi að koma okkur í 3., 4. og 5. gírinn sem tóku við þegar heim var komið. Á mynd 1 sést brot af þessu glæsilega og girnilega útsýni frá Aþenuhofinu yfir Lindos. Á mynd 2 stend ég við einn innganginn að gamla miðbæ Rhodos sem er svakalega fallegur. Á þeirri þriðj erum við hjónin reddí to go home, sólbrún og sæl, svona eins brún og við hvítingjarnir gátum orðið á einni viku :)

Erum að fara í brúðkaup Hjalta og Guðrúnar á morgun, gaman gaman! Síðan tekur alvara lífsins við á mánudaginn þegar Íris gerist kennslukona í fyrsta sinn...spennandi og mjög svo krefjandi verkefni fyrir höndum. Ætla ekki að skrifa meira í bili, en læt nokkrar myndir frá brúðkaupsdegi okkar fljóta með, teknar af Hlynsa hinum nýbaka föður!! Glæsilegar myndir hjá honum...þúsund þakkir!!

Hjónin

2008-07-11T07:22:00.000-07:00

Hér eru tvær myndir af okkur nýgiftu. Fleiri eru á leiðinni en fyrir þá sem ekki voru á staðnum (og auðvitað líka þá sem voru á staðnum) þá getiði séð hversu gríðarlega myndó við vorum þennan daginn :)

Blómvöndurinn minn var gerður af Tobbu og Mæju móðursystrum mínum og var allt hráefni hans fengið úr guðsgrænni náttúrunni, nánar tiltekið í görðunum hjá Lóu í Hjarðarnesi og tengdamömmu. Mér fannst það alveg frábært að hafa vönd í höndunum sem þær sáu um að útbúa, eitthvað svo persónulegt...og ekki er hann síðri en keyptur vöndur!!! En án þeirra móðursystra, vinkvenna og vina okkar Óskars, mömmu, pabba, tengdaforeldra og systkina þá hefði þessi dagur verið kaos!! Það er bara svo einfalt. Takk takk takk og þúsund kossar til ykkar.

Annars eru stelpurnar loksins að komast í sumarfrí, síðasti dagurinn í leikskólanum er í dag. Það er margt á döfinni, en þó verðum við Óskar eitthvað að vinna, en tökum kannski langar helgar ef veðurspá er góð. Síðan er það Rhodos 26. júlí, en Króatíuferðin var búin að hækka svo gríðarlega mikið að okkur fannst það fásinna að eyða 250 þús krónum í vikuferð. Við erum alveg jafn spennt fyrir Grikklandi og teljum dagana!!

Meira síðar.....

Íris

Ekki lent.....

2008-06-30T14:14:00.000-07:00

Nei það eru sko orð með sönnu, við hjónin eru algjörlega í skýjunum ennþá. Brúðkaupsdagurinn var fullkominn í alla staði og rúmlega það. Athöfnin frábær, séra Baldur skemmtilegur, söngurinn æðislegur og Óskar auðvitað laaangmyndarlegastur!!! Djömmuðum til að verða 3.30 og allir í rífandi stuði.

Ástarþakkir til ykkar allra fyrir að fullkomna þennan stóra dag sem við munum aldrei gleyma. Einnig kærar þakkir fyrir allar kveðjurnar og fallegar gjafir.
Knús og kossar,
frú Arason

p.s. Nokkrar myndir sem teknar voru af honum Hlynsa bró snillingi. Þetta er smá upphitun en ég mun setja inn fleiri þegar þær koma í hús.

Fröken Íris kveður

2008-06-24T13:46:00.000-07:00

og það verður FRÚ Íris sem mun skrifa næsta pistil. Mér finnst það að vera FRÚ hljóma eitthvað svo gamaldags, eins og ég sé orðin sjötug. En nú taka við miklar annir í sambandi við stóra daginn og því má ég ekkert vera að þessum skrifum og kveð ykkur að sinni.
Bestu kveðjur frá frökeninni :-)

Allt mögulegt....

2008-06-13T16:00:00.000-07:00

Jájá, tíminn heldur áfram að fljúga áfram á methraða. Ég er enganveginn að skilja að ég sé að fara að gifta mig eftir 2 vikur, ómæ ómæ! Nú er búið að leggja inn STÓRA pöntun í ÁTVR sem vonandi mun duga gestum eitthvað frameftir nóttu og sjá til þess að það verði mikið húllumhæ og trallala. Einnig er góður maður á staðnum búinn að láta okkur fá trilljón lög sem við Óskar verðum að drífa okkur í að skoða og velja úr þau lög sem við teljum að muni halda uppi stuðinu (í bland við vökvann úr ÁTVR:). Og að sjálfsögðu verða nokkur velútvalin "bömp" lög, en þeir sem hafa einhvern tímann verið í partýi með fólki úr minni familíu vita hversu margir eru bömpóðir, að ógleymdum og sérpöntuðum ABBA og Pointer Sisters lögum....... en þeir sem ekki fýla þessháttar tónlist verða bara að gjöra svo vel að drekka meira og drífa sig í tjúttstuðið! Annars verða þeir bara dregnir útá gólfið af mömmu og öllum hinum ABBA -lýðnum. Í okkar brúðkaupi er skylda að skemmta sér vel og leeeengi. Einhvernveginn hef ég ótrúlega litlar, sem engar, áhyggjur af því að fólki mun leiðast, því allir þeir sem verða í Mánagarði þann 28. júní n.k. eru bara lífsglaðir og skemmtilegir einstaklingar.
En talandi um allt þetta áfengi þá er ég ótrúlega léleg þegar kemur að því að drekka vín. Hann Óskar minn fer bráðum að hafa áhyggjur af þessu, bindindismaðurinn sjálfur! Hvar annarsstaðar en heima hjá mér rennur áfengið út!!??? Ég keypti 2 kippur af julebryg öli í fríhöfninni þegar við mamma fórum til Köben í lok október s.l. Ég var búin að steingleyma þeim þar til áðan...ákvað að skella einum í kæli og var þá litið á dagsetninguna...rann út í febrúar! Þetta gengur auðvitað ekki. Opnaði eina hvítvín um síðustu helgi fyrir okkur Hlynsa bró og hún er enn ókláruð inni í kæli, viku seinna..... ég bæti úr þessu í Króatíu, engin spurning.
En yfir í allt annað, eiginlega framhaldssöguna um hana Elínu mína og eyrun hennar, en margir hafa fylgst með spennandi og ansi reglulegum lýsingum af veikindum hennar frá því 4. janúar á þessu ári ;) Þessi elska er aldeilis ekki búin að fá pensillín skammtinn fyrir árið...ónei, komin með sýkingu í vinstra eyrað og beint á uppáhaldsmeðalið sitt Kåvepenin. Vona að þetta sé endanlegur endir í þessari spennandi seríu...
Annar og mun alvarlegri hlutur átti sér stað í gær þegar tengdapabbi slasaði sig við vinnu sína og missti fingur, vísifingur hægri handar. Þetta var auðvitað mikið sjokk en hann er bara brattur kallinn og þakklátur fyrir að ekki fór enn ver.

Já það er s.s. allt að gerast hér, gott og miður gott, en allir eru fullir bjartsýni og hrikalega jákvæðir!!!
Kveðja....Íris ofurspennta!

Spennandi tímar framundan..

2008-06-05T03:17:00.000-07:00

Já nú er bjart yfir öllu, annað en í þegar síðasti pistill var ritaður :) Við erum farin að hlakka ótrúlega mikið til stóra dagsins sem nálgast óðfluga. Ég á erfitt með að trúa því að það sé að koma að þessu, það hefur alltaf verið svo langt þangað til...nema núna. Ég skrapp í prufugreiðslu til Ellýjar í fyrradag og lukkaðist það allt saman vel, enda höfðum við nákvæmlega það sama í huga. Óskar fékk fyrirmæli um að safna hári fram að brúðkaupi svo möguleikarnir á nýju lúkki verði meiri...hehe..hann er orðinn ansi lummó núna, ekki annað hægt að segja um það. Það eina sem mig vantar eru nærföt og þau réttu fæ ég ekki hér á staðnum, ég bara nenni ekki að fara alla leið til RVK til þess eins að kaupa nærföt...en ég veit ekki hvernig ég leysi þetta mál öðruvísi.

Annars er ég að vinna í Nettó, sem er bara fínt. Þar er alltfa nóg að gera og maður nær aldrei að klára allt það sem maður hefði viljað ná að gera þann daginn. Tíminn er líka merkilega fljótur að líða, sem er auðvitað mikill kostur því hangs á ekki við mig. Ég verða að vinna þar til stelpurnar fara í sumarfrí, um miðjan júlí. Stefnt er að því að skreppa í nokkrar útilegur með hjólhýsið þeirra mö og pa, en það verður a.m.k. farið norður til Bjarka og Co, annars verður reynt að elta góða veðrið sem verður vonandi til staðar.

Síðustu tvo daga hef ég verið uppí skóla að undirbúa næsta skólaár og þá aðallega dönskuna. Ég mun s.s. kenna 8. bekkingum íslensku og dönsku, ásamt því að kenna örum bekknum lífsleikni, sá bekkur verður umsjónarbekkurinn minn. Þetta er 92 % stöðuhlutfall og fyrir óreynda manneskju eins og mig verður þetta án efa meira en nóg ásamt náminu auðvitað. Ég er búin að fá allt námsefnið heim og stefni á að rifja upp hin ýmsu hugtök og heiti sem við koma íslenskri málfræði, en hana lærði ég eiginlega aldrei þar sem hún er að mestu kennd í gaggó og þá bjó ég í DK. En þetta er þarna einhversstaðar deep down under og þá er bara að draga þetta upp úr viskubrunninum. Þetta verður allt saman mjög gaman og ég hlakka mikið til.

Aðlögunin hjá henni Elínu minni er öll að koma, hún vælir slatta þegar við kveðjumst á morgnana en það stendur sem betur fer stutt yfir. Þær systur eru í leikskólanum frá 8-15 í sumar en neyðast til að vera til 16 þegar ég fer að vinna í haust. Þetta er ansi langur dagur finnst mér fyrir litlar manneskjur, en svona er bara Ísland í dag og peningarnir vaxa ekki á trjánum, því er nú ver.

Það er s.s. spenna og tilhlökkun í loftinu hér á Mánabrautinni....JEIJ!!
KV, Íris

Nöldur

2008-05-21T03:28:00.000-07:00

Það ætti að seinka þessum blessaða fyrsta sumardegi. Í dag er skííítakuldi! Það er reyndar þannig með veðrið á þessu skeri að allt í einu er bongóblíða (á íslenskan mælikvarða) en svo tveimur dögum seinna er slydda eða snjókoma, frost og kuldi. Ég vildi að sumrin hérna væru a.m.k. eins og dönsk sumur, það væri mikill kostur og þá þyrfti maður ekki alltaf að vera með stöðuga útþrá í sól og hita. Þá gætu Íslendingar líka hætt að eyða svona gígantískum upphæðum í sólarlandaferðir og reynt að slaka aðeins á heima hjá sér í staðinn.
En nóg um það, þetta mun víst ekki breytast þó ég tuði um þetta endalaust..................
Ég er með Elínu Ósk í aðlögun í leikskólanum sem gengur því ver og miður ekki alveg eftir bókinni (reyndar er engin slík bók til um hina fullkomnu aðlögun, en þið vitið hvað ég á við:). Hún er líka svo lítil greyið og ef ég hefði fengið einhverju ráðið þá hefði ég viljað byrja með hana í leikskólanum í ágúst, eftir sumarfrí og haft hana hjá Birnu dagmömmu aðeins lengur. Planið var að byrja að vinna hjá pabba í Nettó strax eftir prófin, en aðlögunin ásamt magapest sem ég ætla ekki að losna við koma í veg fyrir það. Það er alltaf eitthvað!!! Kannist þið við svona? Um leið og maður er með eitthvað fullkomið plan, þá gerist eitthvað.... ælupest, niðurgangur, eyrnabólga eða bara eitthvað...óþolandi!
Þetta er nú meira tuðið í manni, en svona eru sumir dagar einfaldlega. Ég er reyndar hæst ánægð með prófin mín, búin að fá flottar einkunnir og ætti því auðvitað að vera glöð og kát. Hvernig væri að hætta núna og skrifa aftur seinna þegar ég er komin úr tuðgírnum...gáfulegt:)
Over and out...

Dagur í lífi Ungfrú Nettó 2008!!!!

2008-05-11T07:48:00.000-07:00

Já það var heint út sagt ótrúleg tilviljun að ég skuli hafa verið að tjá mig í bloggpistli gærdagsins um væntanlega gæsun, því ekki meira en 2 tímum síðar fór allt að gerast......
Um 2 leytið var ég sofandi sökum magapínu sem hefur verið að hrjá mig undanfarna daga og var vakin af Óskari sem sagði mér að löggan væri komin og vildi tala við mig...what??!!! Ég fer niður í forstofuna og þar standa Gæji lögga og hin löggan sem ég man ekki hvað heitir..hehe..þeir spyrja mig hvort ég hafi verið á subarunum í gær í miðbænum.....já.....það getur verið. "Já það sást til þín þar sem þú rakst utan í einn bíl og fórst svo bara..." - "HA?? Nei þetta er e-ð rugl" - "Jú það er búið að leggja fram kæru" - "Nei nei djöfulsins vitleysa......GUÐ....eru þær að fara að gæsa mig núna, ég trúi þessu ekki?" - "Nú ertu að fara að gifta þig?" - "Já" - "Komdu með okkur út það sést aðeins á bílnum þínum" - "Jájá...allt í lagi.....vá bara með ljósin á og allt" - Þá er mér afhent umslag þar sem m.a. stóð að ég ætti að kalla á þessar svokölluðu vinkonur mínar :) Ég fékk lánað "kallkerfi" löggunnar og sagði þeim að drulla sér til mín. Kemur þá ekki pallbíll með 7 gæsavinkonum innanborðs, sem sáu til þess að til þeirra heyrðist a.m.k. til Djúpavogar, þvílíkir lúðrar og flautur, blöðrum skreyttur bíll og það sem toppaði þetta voru stækkaðar myndir af mér frá því fyrir hundrað árum síðan, s.s. fermingarmyndir og kórónumyndir. Þær náðu mér gjörsamlega og þó ég hafi hugsað þetta og sagt við löggurnar að nú væri verið að fara að gæsa mig, þá trúði ég því einhvern veginn ekki.
Eftir nokkra sopa af áfengi lagaðist maginn (jeij!!) og mér skipað að klæðast furðufötum (reyndar fötum af Ibbu sys, en fyrir mér eru sum þeirra mjög svo furðuleg). Andlitið á mér var eins og diskókúla svo mikið glimmer og glans að það hálfa væri nóg og svo má ekki gleyma aðalatriðinu, eldeldeldrauðri hárkollu. Ég var hreint út sagt "drop dead gorgeus"...... Svo má ekki gleyma borðanum fallega, en ég var krýnd Ungfrú Nettó :):)
En gæsin fékk ekki far, heldur þurfti hún að labba niður á mjólkurstöð og finna þar bjór til þess að fá næstu vísbendingu og sæti á pallbílnum góða. Þá var haldið upp í Hafnarskóla þar sem við lékum okkur í aparólu og fleiri tækjum sem sáu til þess að fleiri en ég fengu magapínu þennan daginn :) Svo var farið niðrá bryggju þar sem ég þefaði upp tvo unga herramenn sem sigldu með okkur á gúmmíbát út í Mikley. Þar átum við og drukkum og skemmtum okkur vel. Við fengum meira að segja frábært skemmtiatriði á leiðinni, en hann Emil tók atriði úr Rocky horror show og var hrikalega flottur!! Síðan var komið að ansi merkum dagskrárlið. Ég var látin klæðast blautbúningi og þurfti að liggja á einhverjum uppblásnum belg og ríghalda mér því "I was going for a ride"!!! Já, ég hélt ég myndi deyja úr hræðslu, en svo var þetta alveg frábært og auðvitað stóð ég mig eins og hetja. Anna Marín og Kolla mynduðu herlegheitin og dóu úr hlátri....a.m.k. pissuðu þær á sig:)
Svo var farið á Jöklasetrið þar sem ég reyndi að halda fyrirlestur um Vatnajökul, en ég get ekki sagt að það sé mín sérgrein. Svo var bundið fyrir augun á mér og allt í einu er ég stödd í æfingahúsnæði hinnar margumrómuðu hljómsveitar Parket. Þar beið mín heldur betur tækifæri til að slá í gegn og ég efast ekki um það að ég geti leyst Pál Óskar af hvenær sem er. Þetta var hrikaleg gaman og við hlógum okkur máttlausar yfir mestu tilþrifunum..... en hey, maður gerir allt fyrir ástina!
Eftir stutt stopp hjá hjónunum á Lækjarbrekku tók við kærkomin afslöppun í heitum pottum í Hoffelli(held ég) í fínasta veðri. Að lokum var brunað upp í Lón, í bústað KASK, Arasel og þar var grillið tekið fram og singstar!!
Í dag er heilsan nokkuð góð miðað við aðstæður :):) Það eru ár og aldir síðan að ég skemmti mér svona vel og í svona frábærum hópi vinkvenna. Dagskráin var pottþétt og allt saman rosalega skemmtilegt, og það besta er að ég er ekki með móral...hehe
Ég vil þakka yndislegum vinkonum mínum, frænkum og systur, þeim Kollu, Önnu Marín, Sonju, Hildi, Guðrúnu, Höllu Katrínu, Möttu og Ibbu kærlega fyrir mjög skemmtilegan dag, fullan af óvæntum dagskrárliðum sem var hver öðrum skemmtilegri, haug af áfengi og góðum mat. Og auðvitað þakka ég líka öllum hinum vinkonum mínum sem því miður gátu ekki verið með okkur fyrir að vera samt með okkur í huganum :):) Mamma fær líka stóran koss................
Ástarþakkir.........þið eruð BESTAR!!
Gæsin

Hin eina sanna Íris snýr aftur..

2008-05-10T05:03:00.000-07:00

Já það eru eingöngu afar jákvæð lýsingarorð sem lýsa líðan minni yfir því að vera búin með skólan að sinni. Tók þessi þrjú próf í vikunni sem gengu stórvel. Ég man ekki eftir því að hafa nokkurn tímann verið svona hrikalega ánægð með að klára eina önn, enda finnst mér eins og hafi ekki gert annað frá áramótum en að sitja á rassgatinu og lært. Jú annað slagið komu upp veikindi sem "krydduðu" aðeins upp á hversdaginn, en nú eru bara bjartir dagar framundan.
Nú eru það önnur og ekki síður mikilvæg verkefni sem taka við eins og brúðkaupið, sandkassasmíði (sem þegar er hafin), aðlögun Elínar í leikskólanum og svo vinna hjá pabba í Nettó. Þar er alltaf brjálað að gera, svo að ég geri ráð fyrir að tíminn fram að brúðkaupi og sumarfríi okkar fjölskyldunnar verði mjög fljótur að líða. Síðan er það Króatíuferðin sem er enn eitt tilhlökkunarefnið auðvitað. Gott að dreifa þessu svona jafnt yfir sumarfríið, alltaf eitthvað skemmtilegt sem bíður manns.
Já og svo slepp ég líklega ekki við gæsun, allavega hafa skvísurnar verið að funda stíft undanfarið. Þetta er svo sem ekkert sem ég vil missa af og hlakka ég ótrúlega til að skála í góðra vinkvenna hópi og skemmta mér fram á morgun. Jíííhaaa!:) Svo lengi sem ég þarf ekki að klæða mig upp sem einhver gleðikona og syngja útí búð, standa á höndum eða framkvæma aðrar eins kúnstir sem eingöngu stuðla að vanlíðan minni og móral næsta árið. Ég myndi alveg þora, en bara ef ég væri stödd á stað þar sem öruggt væri að enginn vissi hver ég væri. Stundum finnst mér gæsanir og steggjanir fara út í öfgar og vitleysishátt, sem ég skil bara ekki. Fatta ekki tilganginn! En það er nú efni í heilan pistil.....
Vegna þess hve hrikalega bissí og leiðinleg vinkona ég hef verið sökum anna í helv...náminu, þá vil ég auglýsa það að húsfreyjan á Mánabraut 2 er nú mjög spennt fyrir öllum matarboðum og kaffiboðum og heitapottshvítvínsboðum og hvaða boðum sem er...ég þarf ekki að læra :):) Og bið alla þá sem ennþá vilja þekkja mig að reka inn trýnið og kíkja í kaffisopa. The house is OPEN!
Yfir til ykkar...
Íris

Konan & gelgjan 2008

2008-04-30T01:21:00.000-07:00

Það er með eindæmum hvað tíminn flýgur, sérstaklega núna þegar maður er orðinn svona "gamall" og hversdagurinn yfirfullur af verkefnum. Allt í einu er Dagmar Lilja á fimmta ári, litla sæta stelpan mín að fara í skóla á næsta ári. Þó hún sé bara 4 ára þá finnst mér á stundum ég vera með ungling. Þegar hún fær ekki það sem hún vill þá tekur hún gelgjukast og hótar manni öllu illu, s.s. : Þá færð þú ekki að koma í herbergið mitt! Þá mátt þú ekki koma í afmælið mitt! Þá lem ég þig fast í hausinn! og fleiri skemmtilegar athugasemdir um útlit mitt....: Þú ert ógeðsleg! Þú ert með ljótt hár! Þetta er ógeðslegt hús! og svona mætti lengi telja. Orðið "ógeðslegt" er ótrúlega vinsælt, sama hvort e-ð er ógeðslega flott eða ógeðslega ljótt.
Ég hélt að litlar 4 ára stelpur væru ekki mikið að spá í útlitinu.....I was wrong! Þó hún Dagmar mín sé oft að dressa sig upp, syngja og dást að sjálfri sér fyrir framan spegilinn þegar hún leikur frægar söngkonur, þá á hún það til að kritisera eigið útlit. Um daginn sagðist hún ekki ætla að vera með freknur þegar hún verður 5 ára. "Nú, ég er með freknur og það er bara mjög flott að vera með freknur", segi ég svona til hughreystingar. "Nei, það er ógeðslegt!" Hver er að spá í freknur á þessum aldri? Eiga börnin ekki bara að vera að leika sér og vera ligeglad um allt annað! Svo eru það áhrifin úr umhverfi barnanna sem upp á síðkastið hafa sýnt sig að vera töluverð, t.d. auglýsingar. Dagmar spurði mig um daginn hvort ég ætlaði ekki að fá mér svona krem fyrir brúðkaupið svo ég fengi svona sléttan háls?#!"#$"%#$%# Bíddu...er ég ekki með sléttan háls? Þarf að tékka á þessu. Reyndar hefur hún ekki talað um lengi að hún sé feit hér og þar....mikill léttir!
Svona er þetta nú stórmerkilegt. Kannski er þetta bara eðlilegt, sérstaklega hjá stelpum.....en 4 ára......come on!
Reyndar er hún Dagmar mjög skýr og er fljót að tileinka sér ýmislegt sem hún heyrir og sér. Ef hún fengi að ráða þá væri Popp-tv á allan daginn, því hún dáir alla þessa listamenn og tónlist, en verst hve margir þeirra eru fáklæddir og dansarnir glyðrulegir. Langar ekkert sérstaklega að Dagmar fái þá hugmynd í kollinn að bert hold og titrandi rasskinnadans og glennuskapur sé eftirsóknarvert. Mikið er leiðinlegt að sjá hvernig ímynd konunnar birtist okkur víða. Annað hvort eigum við að versla krem í tonnatali til þess að þroski okkar sjáist örugglega ekki, eða þá að vera fáklæddar og grindhoraðar. Þá kýs ég frekar þá ímynd sem var hvað mest áberandi upp úr miðri síðustu öld: heimavinnandi húsmóðir, með svuntu, kökukeflið í annarri, krakkann á mjöðminni og ryksuguna í hinni, brosandi glöð og hamingjusöm og allt tandurhreint og fínt!
Og hana nú...
Íris

Fjórhjól og freknur

2008-04-20T05:51:00.000-07:00

Undanfarnir dagar hafa verið hreint frábærir í alla staði. Síðasta föstudag fórum við Elín til RVK og fengum sett í hana rör og nefkirtlar teknir. Flugið og aðgerðin gengu eins vel og hægt er að óska sér. Hún var ægilega reið þegar hún vaknaði af svæfingunni, en jafnaði sig um leið og við fórum út af læknastofunni. Þar inni voru allir í grænum skurðlæknafatnaði sem henni leist ekkert á og vildi komast út hið snarasta. Í gær var hún svakalega brött og var úti að leika í blíðunni allan daginn með Dagmar Lilju, systrunum í þarnæsta húsi og okkur Óskari. Það er nú meira hvað gott veður hefur mikið að segja. Við drifum okkur út í garð og tókum hann aðeins í gegn, eigum reyndar eftir að klippa tréin aðeins. Þær systur fengu fullan kassa af útileikföngum og garðslönguna, og þá var allt í himnalagi -hægt að drullumalla og skíta sig út...það er bara gaman. Ætlun að finna einhvern kofa handa þeim þar sem þær geta drullumallað að vild, það gefst líklega ekki tími til að smíða einn eins og útlitið er núna, annað sem þarf að huga að. Síðan var grillið þrifið og borgurum skellt á sem voru snæddir með bestu lyst. Þannig að gærdagurinn kom okkur í sumargírinn sem er síður en svo leiðinlegur gír að vera í!
Í dag virðist veðrið ekki ætla að svíkja okkur. Byrjuðum á því að fá okkur morgungöngu til Ara og Inguló og fengum okkur snarl. Pabbi var að kaupa fjórhjól þannig að Óskar og Dagmar drifu sig þangað á meðan Elín leggur sig. Veit samt ekki hvort þeirra er spenntari...held Óskar :)
Vona að sólin skíni á ykkar bæ!!
Kv, Íris með fullt af nýjum freknum

Endaspretturinn og fallega fólkið

2008-04-10T02:26:00.000-07:00

Þá erum við "hjónin 2B" komin úr langþráðri borgarferð. Reyndar fannst okkur þessir dagar allt of fljótir að líða, en þetta var samt sem áður mjög kærkomið frí án barna :) Við keyptum hringana, servíettur, blöðrur, kertastjaka, völdum matarstell og hnífapör, fundum frábær kjólföt á Óskar frá 1950, sem tveir úr minni famílíu giftu sig í og ýmislegt annað. Við náðum að gera allt það sem við þurftum að klára að þessu sinni. Svo er líka búið að ráða söngvara og velja lögin, en tónlistin skiptir okkur MJÖG miklu máli. Þannig að núna er nettur fiðringur kominn í okkur og tilhlökkun! Ömmur og afar pössuðu systurnar og það gekk eins og í sögu. Reyndar var Elín e-ð slöpp sem reyndist svo vera eyrnabólga nr. 4 á þessu ári. Nú vonum við að þessi blessaði eyrnalæknir fari að hrigja í okkur, því rör eru það sem barnið þarf á að halda sem fyrst.

Það er svo merkilegt með kennara hvað þeir virðast vera verkefnaglaðir á leiðinlegum tímum, t.d. rétt fyrir annarlok og próf. Ég fer í próf 5 +6 +8 maí og alveg hellingur af verkefnum eftir. Lokaskil síðasta verkefnisins er t.d. 9. maí, eftir próf!! Nei takk....nú er bara að spýta í lófa og klára þetta helv.... Ég held ég muni aldrei verða eins fegin og þegar þessari önn lýkur.

Stöð 2 er búin að vera ólæst þessa vikuna, líklega vantar þá fleiri áskrifendur og eru að reyna að lokka þá með þessum hætti. Sá að það er ennþá verið að sýna "Bold and the Beautiful". Ó mæ god! Ég var húkt á þessum þáttum fyrir......17 árum síðan þegar ég bjó í DK, þar heita þættirnir "Glamour". En áðan sá ég s.s. byrjunina (ca 15 sek) og þar er hann Ridge að væla yfir því að einhver Nick (minnir mig) geti ekki gert hana Brook eins hamingjusama og hann sjálfur gæti. Bíddu....hversu oft er Ridge búinn að vera giftur Brook? Er hann skilinn við dökkhærðu gelluna? Er Brook kannski gift pabba Ridge, eða bróður hans? Eða er dökkhærða fyrrverandi eiginkona Ridge gift pabba hans? Úff...hver nennir að horfa á þetta? Fékk minn skammt fyrir 17 árum síðan.

Nóg í bili.
Íris

Harkan!

2008-03-27T02:40:00.000-07:00

Þá er páskafríi lokið. Það var alveg æðislegt að fá Bjarka, Erlu og krakkana í heimsókn, og þetta var eitt besta fríið í langan tíma. Ég lærði ekkert, sem var alveg frábært fyrir geðheilsuna, fyrir utan það að lesa eina danska bók sem ég þarf að skrifa um síðar í mánuðinum. Bókin heitir Colorado Drömme, og er ástarsaga uppá rúmar 300 bls. En það er bara gaman og góð tilbreyting frá hinum hefðbundnu námsbókum.
Páskafríið einkenndist af áti og meira áti, smá djammi, en annars bara rólegheitum. Það voru allir við hestaheilsu sem betur fer og því var m.a. skroppið í fjöruferð í nístingskulda. Dagmar var ægilega ánægð að sjá Arnór frænda, og þrátt fyrir að hann sé nú 4 árum eldri en hún og orðinn svaka töffari með eyrnalokk, þá kom þeim bara ótrúlega vel saman. Hann má nú eiga það þessi elska að hann hefur alltaf verið einstaklega barngóður, og þegar við bjuggum öll í Hraunbænum þá lét hann það ekkert á sig fá að hafa litlu frænku í eftirdragi þegar vinirnir voru úti að leika.
En þar sem tíminn vægast sagt flýgur áfram og ég áttaði mig á því að það eru aðeins 3 mánuðir í brúðkaup, þá var keypt kort í líkamræktarstöðina hér á staðnum. Við Óskar hittumst í ræktinni í hádeginu 3-4x í viku og "work our assess off" hehe... Nú er það bara harkan og ekkert annað. Það er alltaf jafn erfitt að koma sér af stað, bara fara á staðinn, en um leið og ég byrja finnst mér þetta alltaf jafn gott og skemmtilegt. Þetta finnst mér æðislegur lúxus að geta hist í hádeginu og púlað saman. Blakið er auðvitað á sínum stað, alltaf á mánudögum, enda um að gera að hafa tilbreytingu í þessu.
Það styttist í helgarferð okkar "hjóna" til RVK. Ætlum að bruna eftir viku og vera frá fimmtudegi til sunnudags, ÁN barna. Það er reyndar nóg á dagskránni því það þarf að kaupa hringa, borðskraut, athuga með blóm og brúðarvöndinn, kaupa föt á stelpurnar, athuga með föt á Óskar o.s.frv. Við erum búin að bóka verkalýðsíbúð í borginni, þar sem við ætlum að sofa vel og lengi! Svo er ekki verra að vera boðið í mat til vina og vandamanna öll kvöld. Þetta verður fjör!!
Later.........Íris

Ahhhhhh......

2008-03-18T14:35:00.000-07:00

Já, mér fannst eins og það væri verið að pressa aðeins á mann þarna í Ameríkunni og ákvað að drífa í að skella einhverjum orðum á "blað."

Mér líður núna eins og titillinn á að lýsa, svona vellíðunarafslöppunareftirmikiðálagstunur! Nú er það bara páskafríið framundan í faðmi fjölskyldunnar og fjarri námsbókum eins og ég mögulega kemst upp með. Komst loksins í það í dag að þrífa svínastíuna sem á að kallast heimili. Óskar hafði orð á því í gærkveldi að við gætum farið að maila á þær á Skjá1, sem sjá um "Allt í drasli" þáttinn. Það versta var að ég hafði verið að hugsa það sama. En auðvitað kom það alls ekki til greina, svo ég skellti bara honum Palla vini mínum í spilarann í dag, svona 3-4x, og "blingbling." Það er nú meira hvað manni líður vel þegar allt er tandurhreint og fínt. Ég á ekki langt að sækja þrifæðið, ef það mætti kalla það svo. Á erfitt með að einbeita mér og framkvæma hlutina ef það er drasl eða skítugt í kringum mig. Get ekki einu sinni borðað ef það er ekki fínt!
Þetta var fínasta líkamsrækt, því það tekur á að þrífa 170 fm!

Er byrjuð í blaki, by the way. Hef farið síðustu þrjú mánudagskvöld og skemmti mér konunglega, þrátt fyrir marbletti og eymsli hér að þar. Þó ég sé nú enginn "smassari" né mikill keppnismaður þá er félagsskapurinn einn þess virði að mæta. Frábær tilbreyting og slæ tvær flugur í einu höggi, s.s. hreyfing og félagsskapur. Held þessu pottþétt áfram!
Ég vona að þið öll hafið það náðugt um páskana, og fáið íslenskt páskaegg hvar sem þið nú eruð stödd í þessum heimi. Það er möst!!
Later....Íris

Ég elska.....

2008-02-28T01:32:00.000-08:00

útsýnið mitt. Þegar við fluttum í stóra og fína húsið okkar þá var ég með það alveg á hreinu hvar tölvuherbergið ætti að vera, nefnilega þar sem útsýnið er hvað best! Þegar maður situr á afturendanum svona flesta virka daga frá 9-3 þá skiptir þetta svo gífurlega miklu máli. Útsýnið gefur manni svo mikinn innblástur þegar heilinn er dofinn, sem á það til að gerast...believe you me. Útsýnið er sjaldan betra en einmitt á svona dögum eins og í dag. Smá frost, logn, heiðskírt, sólskin og allt hvítt...fjalla- og jöklasýnin er ólýsanleg...en mig langar samt alltaf í aðeins meira. Vildi að ég gæti fært húsið mitt nær golfvellinum svo ég hefði panoramaview. Spurning hvort golfáhugamenn myndu ekki sýna mér skilning og færa braut 1 eða 2, nú eða bara golfskálann? Einfaldast væri kannski bara að taka smá ofan af hólnum sem blokkerar útsýnið....
En yfir í allt annað. Nú styttist í að verðandi kennarinn þurfi að fara að æfa sig í kennslu 7 ára barna. Ég er búin að liggja yfir gerð kennsluáætlana með stöllu minni úr KHÍ og get ekki beðið eftir að þeirri vinnu ljúki...sem mætti gjarnan verða í kvöld!! Þá fara næstu tvær vikurnar í það að fræða blessuð börnin um íslenskar þjóðsögur og Kötlugos, svo e-ð sé nefnt...eins gott að kynna sér málin áður. Þetta verður kærkomin tilbreyting frá kyrrsetunni og einverunni hérna heima og verður ábyggilega líf og fjör!! Svo mun bara koma í ljós hvort mér takist að vekja áhuga þeirra...vil helst ekki að þau fari heim og kvarti yfir "nýja" kennaranum, eða "starfsmanni í þjálfun" eins og ein í bekknum kallaði mig alltaf í áheyrninni :)
Annars er Elín mín bara brött, enda enn að taka inn meðalið sitt.... en við bíðum bara eftir að sérfræðingurinn bjalli í okkur og kalli hana í rör. Annars væri það alveg eftir bókinni að hún fengi aftur í eyrum um páskana, en þá eru allir sjúkdómar BANNAÐIR og öll veikindi BÖNNUÐ. Við fáum nefnilega Bjarka bró, Erlu, Arnór og Önnu í heimsókn, og við nennum engu veikindastússi..og hana nú!!

Hafið það gott ..... kv, sveitapían með góða útsýnið

Allt í plati!

2008-02-23T03:12:00.000-08:00

Já, bælið lifnaði við en bara í smá tíma...oooooooohhhhhhhhh. Elsku litla Elín mín komin með í eyrun AFTUR og að þessu sinni er hljóðhimnan í öðru eyranu sprungin en mikil bólga í hinu. Það er svo merkilegt að þessi veikindi undanfarið hafa alltaf blossað upp á nóttunni og um helgar. En núna er heimsókn á heilsugæsluna lokið og hún s.s. komin á pensillínskammt nr. 4 og tegund nr. 4, ekki gott :( Vonumst til að fá tíma hjá sérfræðingi í vikunni og fá í framhaldinu tíma fyrir barnið í röraísetningu, annað er ekki hægt í þessari stöðu.
Ég ætlaði að skreppa í borgina á mánudainn og vera fram á föstudag vegna staðlotu í skólanum, en það verður ekkert úr þeirri ferð því miður. Hefði þurft að klára stærsta verkefni annarinnar um helgina með stöllu minni hér á Höfn, en það mun að öllum líkindum ekki takast vegna veikindanna og því þarf ég að blása ferðina af og vinna í verkefninu í vikunni.
En annars er allt gott af öllum öðrum í familíunni og hún Dagmar mín skrapp á ístöltmót á Eiðum með ömmu Ellu og afa Pálma. Ég hugsa um það oft á dag hvað það er yndislegt að hafa ömmurnar og afana svona nálægt okkur, og ég segi nú bara alveg eins og er, að ef ömmurnar væru ekki á staðnum þá væri ég í mjög DJÚPUM SK.. í náminu. Ég er þeim innilega þakklát og vona að þær viti það nú þegar.
Jæja ég held ég bulli ekki meira í bil og fari að sofa eftir 29 tíma vakt!
ZZZzzzzzzzzzzzzzzzzzzzzzzzzzzzzzzzzzzzzzzz.......................

Bælið er að lifna við :)

2008-02-12T07:17:00.000-08:00

Mikið lifandi skelfingar ósköp er ég fegin því að heilsa dætra minna sé komin í lag 7-9-13. Nú er lífið farið að taka aftur á sig hina hversdagslegu mynd, allir í sinni vinnu, kátir og glaðir eins og það á að vera. Nú þarf ég að taka mig á í lærdómnum og vinna upp það sem ekki gafst tími fyrir að framkvæma, en það er pís of keik.
Nú erum við skötuhjúin farin að hugsa um allt aðra hluti en veikindi, nefnilega brúðkaupið og ýmislegt sem því viðkemur. Nú er farið að vinna í boðskortum, erum með mjög áreiðanlegan starfskraft sem sér um þau mál, hana Helgu Dís:) Nú bíðum við spennt eftir útkomunni. Svo er það brúðkaupsferðin sem á hug okkar þessa dagana, en fyrirhugað er að við TVÖ skreppum í viku til Króatíu þar sem við ætlum að dekra við okkur á góðu hóteli. Það skal tekið fram að við hótelleitina reyni ég að sigta út það hótel sem minnstar líkur eru á að sé yfirfullt af börnum...jámm ég viðurkenni það hér með! Svona er maður nú sjálfselskur :) Það er s.s. planið að fara í viku í byrjun Ágúst. Ef eitthvert ykkar sem les þetta hefur upplifað norðuhluta Króatíu, þá má hinn sami gjarnan deila þeirri reynslu með okkur.
Svo er planið að fara að hrista af sér spikið, því nóg er í boði í sveitinni. Ég gæti t.d. skroppið í blak, sundleikfimi, konu"fimleika" nú eða í ræktina og tíma hjá Kollu. Reyndar er badmintonið á óhentugum tíma, en það finnst mér skemmtileg íþrótt.
Nú jæja, ekki var það fleira að sinni.
Yfir til ykkar...Íris

Nýtt lögheimili: Heilsugæslan

2008-02-02T14:22:00.000-08:00

Já það er ekkert lát á veikindum á þessum bæ frekar en fyrri daginn. Þessi janúarmánuður er búinn að vera alveg ótrúlegur. Elín mín byrjaði á því að fá hálsbólgu þann 4. janúar á afmælisdaginn sinn og í framhaldinu háan hita, farið var á heilsugæsluna og henni gefin sýklalyf. Litla greyið lagaðist nú lítið sem ekkert, var með svo mikla hálsbólgu að það mætti líkja við rödd 70 ára kellingar sem hefði drukkið 1 lítra af viský á dag frá fæðingu (svona cirka:). Ekki lagaðist þetta, hún borðaði kannski eina krukkumauk á heilum 5 dögum (og nú er ég ekki að ýkja). Litlu sætu lærakeppirnir voru farnir að láta á sjá, fyllingin að hverfa. Ákveðið var að fara aftur uppá heilsugæslu, niðurstaðan var vírus. Ekkert hægt að gera nema að stíla hana reglulega og vona að vírusinn fari fljótt. Eftir 10 daga veikindi var mín orðin frísk, sem kom sér vel því ég þurfti að fara í staðlotu til RVK, tók Dagmar með mér. Við mæðgurnar skemmtum okkur konunglega, fórum í leikhús að sjá Gosa, og hittum vini og ættingja sem maður sér allt of sjaldan, sem sagt svaka gaman. Við Dagmar komum heim á föstudegi og þar bíður Elín litla eftir okkur...lasin! Hringjum uppá Heilsó, niðurstaða annar vírus en ekki eins skæður, ætti að taka 3-5 daga, algengt að fá eftir fyrri veikindin. OK! Jæja, Elín mín varð hress á fimmta degi og gat skroppið til Birnu dagmömmu í nokkur skipti, henni til mjög mikillar ánægju. Greyið litla var farið að toga í útigallan sinn og barnavagninn í forstofunni og BIÐJA um að komast út. Ekki entist þetta nú lengi, því nokkrum dögum síðar var hún orðin slöpp...NEIIIII!!! Fór með hana uppá Heilsó, niðurstaðan, eyrnabólga og þ.a.l. sýklalyf again. Kvöldið eftir vaknar Dagmar Lilja upp með látum og kvartar yfir því að finna til í eyrunum. Fór með hana uppá Heilsó, niðurstaða eyrnabólga! Eyrnabólgusysturnar kláruðu sýklalyfjaskammtana sína í fyrradag og Elín búin að vera svaka spræk en ennþá svona hás...vona að það lagist fljótt. Í gær var Elín komin með hita, nefrennsli og hósta, öll einkenni eyrnabólgu....eigum tíma á mánudagsmorgunn. Dagmar Lilja aftur á móti finnur ekki lengur til í eyrunum, en nú vill hún alls ekki pissa því það er svo sárt. Hún grét á klóinu í dag og kvöld og orgaði af sársauka. Líklega blöðrubólga...hittum lækninn á morgun, vonandi með þvagsýni, ef hún fæst til að pissa.......greyin!!!
Vona að þessi mikli mánuður veikinda og sýklalyfja verði ekki öllu lengur en "bara" mánuður...fer samt að skríða inn í mánuð nr.2.
Ekki hressandi pistill að þessu sinni, en svona er nú bara Ísland í dag!
GEISP....Íris

Eitt & annað.....

2008-01-22T12:34:00.000-08:00

Það er ekki hægt að kalla mig öflugan bloggara, enda þykist maður alltaf vera svo hriklega bissí og gefur sér lítinn tíma í bloggskrif. Ég er samt sem áður þess fullviss að ég hafi grætt nokkrar klukkustundir á dag eingöngu vegna þess að ég bý nú á Höfn en ekki í Reykjavík. Í borginni fannst mér ég alltaf vera keyrandi, og það eitt að skreppa í bónus tók lágmark hálftíma, en hér get ég skroppið í Nettó á 10 mínútum. Þrátt fyrir þessa auka tíma, þá hef ég samt sem áður ekki tíma fyrir það sem ég hélt að ég myndi hafa tíma fyrir þegar ég væri flutt í sveitasæluna. Reyndar kenni ég náminu um að miklu leyti, en þeir sem eru og hafa verið í háskólanámi vita að vinnudeginum lýkur aldrei, það er alltaf hægt að gera meira. Mikið hlakka ég til þegar áfanganum verður náð, og það styttist í það. Þessi önn verður mjög strembin, en á næsta ári dóla ég mér að takmarkinu og fæ vonandi að starfa sem kennari með á síðustu metrunum. Ég þurfti því ver og mjög mikið miður að hafna tilboði ,sem dönskusjúklingi eins og mér finnst afar spennandi, en það var afleysingakennsla í dönsku , 8 tíma í viku í 4-6 vikur. Allt er það skólanum að kenna...ENGINN tími, alltaf að læra. Það er nefnilega þannig að á þessari önn er ég í vettvangsnámi í 2. bekk í Nesjaskóla og mun kenna þar í byrjun mars í 2 vikur, en undirbúningur fyrir slíkt er afar tímafrekur. Tveir dönskuáfangar á önninni halda mér gangandi.....af hverju flyt ég ekki bara til Danmerkur?? Elska sumrin þar, reyndar eru sumur í flest öllum öðrum löndum heimsins betri en hér, elska málið, elska rólegheitin, elska þetta ekta danska andrúmsloft og elska dönsk hús, allavega mörg dönsk hús. Það er aldrei að vita, kannski maður skelli sér í mastersnám til Danaveldis eftir x mörg ár. Mamma og pabbi fóru nú út með okkur FIMM, já fimm stykki börn á aldrinum 1. árs til 15. ára takk fyrir og svo var keyptur hundur í þokkabót, þannig að á mínum bæ er "mikið mál" engin afsökun.
Jæja.....best að nýta tímann og læra ;)
Hilsen, Íris

Guð er alltaf að poppa!

2008-01-11T04:34:00.000-08:00

Það er með eindæmum fyndið hvað börnin manns (og annarra) geta látið upp úr sér. Ef maður bara gæti lesið hugsanir þeirra, væri maður örugglega í krampakasti alla daga. Hún Dagmar mín er enginn undantekning hvað varðar spakmæli og fyndnar pælingar. Við Óskar þurfum alltaf að láta hana pissa áður en við förum að sofa, því annars eru 99 % líkur á því að hún vakni upp um miðja nótt til að pissa, og því nennum við ekki ;) Allavega..þá var ég að girða hana í fyrrakvöld þegar hún kom með þessa setningu um Guð sem væri alltaf að poppa! Já, er það...hmmm. Eftir að við mæðgur lásum kvöldsögurnar þetta sama kvöld þurfti hún mikið að spjalla. Ég ákvað að kúra aðeins hjá henni og eftir smá stund sagði hún: Mamma, veistu hvað mig var að dreyma? Nei...bara strax farin að dreyma? Mig dreymdi að ég væri á dansleik með Júlíusi og Björgvini, og þeir voru að halda á mér og lyfta mér og kyssast! Jahá...það er aldeilis, bara mín í einhverju prinsessudansleikjadraumalandi (fyrir utan það að hún var auðvitað ekki sofnuð og því ekki að dreyma). Hún tilkynnti mér svo það að hún og ofangreindir vinir hennar, sem eru tvíburabræður, væru kærustupar. Ok, snemma byrjar það......
En nú er Elín mín vælandi, litla lasna dúllan sem var svo heppin að fá einhvern vírus, þannig að ég læt þetta duga að sinni.
Over, Íris

Hún er eins árs í dag!!

2008-01-04T04:26:00.000-08:00

Já það er stutt á milli afmæla þeirra systra, aðeins rúmur mánuður síðan að Dagmar Lilja varð 4. ára. Fyrir ári síðan fæddist hún Elín Ósk, heilu ÁRI síðan. Ætlum að bjóða fjölskyldunni í kaffi á morgun, vonandi hefur fólk ennþá matarlyst eftir jólaátið!

En hér er litla prinsessan okkar nýfædd og orgar eftir mjólk!!

Og hér er hún með stóru systur um ári síðar! Mikið svakalega er ég heppin :):)

Þangað til næst...... og gleðilegt ár!

Íris

Gleðileg jól kæru vinir & vandamenn

2007-12-23T13:35:00.000-08:00

Það styttist óðum í að klukkurnar hringi inn jólin. Nóg er á dagskrá morgundagsins og því tilvalið að henda nokkrum hugsunum á "blað" í kvöld. Ilmurinn af hamborgarhryggnum, klukknahljómurinn kl. 18 og útvarpsmessan í framhaldinu eru merki þess að jólin eru komin á mínum bæ. Þegar stelpurnar eldast förum við kannski með þær í messu, en það verður ekki þessi jólin. Við erum búin að skreyta þetta fína tré sem Óskar og Dagmar völdu í vikunni. Dagmar er loksins komin á þann aldur að hún er farin að skilja meira og taka þátt í udirbúningnum á margan hátt, sem okkur foreldrunum finnst svo skemmtilegt. Hún tók t.d. mjög virkan þátt í að skreyta tréð fyrr í kvöld, skrifaði á pakkaspjöld og skreytti piparkökur svo eitthvað sé nefnt.
Ég var að horfa og hlusta á hana Svanfríði á bloggsíðu hennar, en hún býr í USA. Það er eitthvað við þennan tíma sem veldur því að hugsanir manns fara á fullt, jákvæðar hugsanir. Á hverju ári á þessum tíma hugsa ég hvað ég er einstaklega heppin og rík að eiga frábærann mann og tvo gullmola. Ég fyllist þakklæti fyrir það hvað ég á góða að, yndislega fjölskyldu og góða vini. Við Svanfríður eigum nefnilega það sameiginlegt að í okkur báðum slær agnarlítið músarhjarta og á þessum tímum, sérstaklega, verður maður e-ð svo viðkvæmur.

Ég óska ykkur öllum gleðilegra jóla og vona að ykkur öllum líði jafn vel í hjartanu og mér :)

Íris

Bleik jól!

2007-12-21T02:14:00.000-08:00

Þá fer að koma að því, 31. jólin mín. Eðlilega man ég ekki eftir þeim öllum, en ein og ein minning poppar fram annað veifið. Mér eru sérstaklega minnisstæð þau jól þar sem ég hefði komist að því hvað ég fengi í jólagjöf frá pabba & mömmu fyrir aðfangadag. Ég var með eindæmum forvitið barn og ég var alltaf jafn svekkt út í sjálfan mig eftir að ég hafði fundið leynipakkastaðinn og séð gjöfina handa mér, en samt gerði ég þetta!! Ég er þekkt fyrir mitt músarhjarta og sem barn var ég voðalega lítið hrifin af jólasveinum. Þegar ég var 4-5 ára bjuggum við í Bolungarvík og eyddum jólunum með Tobbu systur mömmu og Kristjáni manninum hennar. Á aðfangadagskvöld er bankað á útihurðina og mitt litla hjartatók kipp!! Inn kom jólasveinninn og ég sat sem fastast í fangi mömmu og þorði lítið sem ekkert að gera. Eftir að sveinki fór aftur og við fórum að ræða þessa upplifun betur, hafði ég aðeins eitt að segja og það var ,,Af hverju var jólasveinninn í konustígvélum?" Þá hafði Tobba skellt sér í búning og leðurstígvélin sín.... svona feminin jólasveinn!!

Þið sem ekki kannist við málið veltið eflaust fyrir ykkur hvaða mynd þetta er hér að ofan. Þessa mynd og fleiri myndir af bleikum femínistajólasveinum má finna á síðu einnar MJÖG harðrar femínistakonu hér á landi, Sóleyjar Tómasdóttur. Um er að ræða myndir af jólasveinunum ásamt texta sem prýða jólakort femínistafélags Íslands. Veit eiginlega ekki hvernig ég á að orða þetta en mér finnst þetta allt allt of langt gengið. Ég tel mig vera femínista og vil jafnrétti í einu og öllu....en þarf að blanda jólasveinunum í málið?!! Smekkleysu má kannski kalla þetta. a.m.k. leiðist mér þegar þörf umræða verður að vitleysu eins og þessari!!

Íris....rauði jólasveinninn

jólajólajólajóla...

2007-12-14T01:20:00.000-08:00

Þá er jólaundirbúningur hafinn hér á Mánabrautinni fyrir alvöru. Rauð jólasería hangir framan á húsinu, inniljós hér og þar og svo auðvitað jóladúkar og aðventuljós. Húsmóðirin ég fór meira að segja út í blómabúð og keypti efni í útikrans, en slíkt föndur er ég síður en svo þekkt fyrir. Ég fékk góðar leiðbeiningar og aðstoð mömmu við að koma honum saman, og er ég bara hin ánægðasta með útkomuna. Svo skellti ég í súkkulaðibitasmákökur sem lukkuðust líka glimrandi vel og bragðast sem betur fer líka jafn vel. Held að þessi lyftidufts-natron uppgötvun mín sé loks farin að skila árangri!! About time!
Eitt af því besta sem ég veit, er að lesa góða bók, það er minn quality time. Nú eru skólabækurnar komnar til hliðar og LOKSINS er ég farin að lesa Flugdrekahlauparann. Þetta er reyndar í þriðja sinn sem ég byrja, en sökum anna hefur bókin alltaf verið lögð til hliðar. Núna er ég komin langt með hana og get varla lagt hana frá mér. Ef þið hafið ekki lesið hana, þá er óhætt að mæla með henni.

Nú fær hún Dagmar Lilja í skóinn í fyrsta sinn, en hún talaði ekkert um þetta á síðasta ári og því fannst okkur tilgangslaust að byrja á þvi þá. Á hverjum morgni segir hún ,,mamma, sjáðu hvað Stekkjarstaur (eða hver sá sem kom þá nóttina) var ánægður með mig!" Og svo er svo leikandi létt að koma henni í rúmið þessari elsku, reyndar hefur það nú aldrei verið vandamál, en nú er enn meiri ástæða til að drífa sig í háttinn. Einn ókostur fylgir þessari heimsókn jólasveinanna og það er hversu áköf hún er að drífa sig fram úr á morgnanna, nú er ekkert verið að kúra..ónei!!

Á von á nokkrum kvennsum í heimsókn í kvöld, ætla að bjóða "föndurklúbbspíum" (með áherslu á föndur :) í spæsí súpu og öl, og svo verður líklega farið í leiki og ekki má gleyma jólapakkalottóinu. Kannski maður fari þá að taka til hendinni hér heima á meðan skotturnar mínar eru ekki á staðnum.
Gangi ykkur vel í jólaundirbúningnum!
Kv, Sveitapían

Ó hvílíkt frelsi!!

2007-12-06T03:59:00.000-08:00

Frábær tilfinning að vera búinn með skólann á þessu ári a.m.k. Þá tekur bara eintóm sæla við án námsbóka í heilan mánuð, getur ekki orðið betra!! Gat ekki varist brosi þegar ég gekk út úr prófstofunni, enda ekkert lítil verkefnagleði kennara á önninni og mikil vinna þar af leiðandi. Það er svo kósý stemning hérna í sveitinni, að öllum sem voru í prófi var úthlutað sprittkerti til að ná slökun. Svei mér þá ef það hefur ekki bara virkað!
Nú ætla ég s.s. að leggja mig alla fram við að komast í jólagírinn, skreyta hátt og lágt, kaupa jólagjafir, prenta jólakort, BAKA og hlusta á yndisleg jólalög. En ég er búin að komast að því hve lítið jólaskraut ég á núna, miðað við þegar ég bjó í Hraunbænum, húsið er svo stórt! Geri það besta úr því sem til er, sem vonandi dugar. Held samt að það þurfi ekki mikið til, ég er nú þegar komin í þvílíkt jólastuð :) Og svona til þeirra sem eru jafn litlir bakarar og ég, en ALLT mislukkast sem ég reyni að baka, þá er ég búin að komast að því að lyftiduft og natron er EKKI það sama (og ég nýbúin að fatta það,31 árs gömul...sssshhhhhhh ekki segja)!! Hahahaha....nútímahúsmóðir eða hvað?
Jæja, út með skólann inn með jólin:) Jibbí
Kv, Íris Konditori

Köben og skóli..

2007-11-25T08:01:00.000-08:00

Jæja, þá erum við mæðgur komnar heim eftir frábæra ferð til Kaupmannahafnar. Það er alltaf góð tilfinning að vera þar, og ekki skemmir að vera í æðislegri íbúð Marínar móðursystur, sem er örstutt frá Strikinu og Nyhavn, og í góðum félagsskap. Það er auðvitað mikill kostur þegar mikið er verslað, þá tekur bara 10 mín að skreppa í íbúðina með varninginn og halda svo áfram;)Við drukkum ófáa julebryg og hvítvín, sem var kærkomin tilbreyting.
Brúðakjólamátunin var skrýtin upplifun. Maður er auðvitað ekki vanur því að máta svona flík (sem betur fer) og mér leið lengi eins og rjómaköku. Þjónustan var alveg frábær og hún Bettina vissi alveg hvað fór mér og útskýrði allataf hvers vegna og hvers vegna ekki og allt það. Mamma, sem er með músarhjarta eins og ég, fékk tár í augun þegar ég var komin í rétta kjólinn, þannig að það má búast við miklu táraflóði þegar stundin mikla rennur upp. Hildur var með okkur líka, og það var rosalega gaman hjá okkur. Fann meira að segja kjóla á stelpurnar, sem eru voða sætir sumarkjólar. Nú þarf bara að bíða....lengi!
Hún Dagmar Lilja varð 4 ára í gær og hélt upp á það með því að bjóða til veislu nokkrum vinum af leikskólanum, og síðar um daginn ömmum og öfum. það var mikið fjör, en 2 klst er sko meira en nóg fyrir þennan aldur!! Hún var alveg að spila út greyið og vissi ekkert hvernig hún ætti að haga sér, svo úr varð heljarinnar show með ups and downs :) Við setjum fljótleg inn myndir á síðuna þeirra systra.
Svo fer að líða að prófinu eina og sanna, sem ég er engan veginn að nenna. En, illu er best af lokið!!
Elín mín er alveg að spila út inn í herbergi, á að vera sofandi, svo það er best að sinna frökeninni.
Læt heyra í mér eftir prófið, það verður vonandi glaður og sæll kennaranemi sem skrifar pistilinn þá!
Kv, Íris Heiður

Venlig hilsen.....

2007-11-13T12:37:00.000-08:00

Já, þá er að styttast í mæðgnaferðina langþráðu. Vildi bara kasta á ykkur kveðju....á dönsku selvfölgelig:)
Til næste gang.....venlig hilsen,
borgarpían ;)

Overdose....

2007-11-08T13:28:00.000-08:00

Ekki er það nú áfengið eða eiturlyfin sem ég hef óverdósað á, heldur lærdómurinn. Mikið svakalega eru allir kennarar verkefnaglaðir á sama tíma. Ég er gjörsamlega búin að fá mig fullsadda á lestri um agavandamál, málþroska barna og eigindlegar rannsóknir. Ég get svarið fyrir það að til eru 10 þús leiðir og ráð um það hvernig leysa skuli úr agavandmálum sem upp koma í skólastofunni, hvort sem það eru skyndilausnir eða langtímalausnir. Það er alltaf og allsstaðar verið að tala um það hversu gott það sé að vinna með nemendum sínum t.d. að bekkjarreglum, tilhögun heimanáms, uppröðun skólastofunnar og fleira. Nú halda sumir því fram að ein leið til að leysa agavandamál sé að fá nemandann til að setjast niður og ræða við hann um það hvað hann telji bestu "refsinguna" hverju sinni. Sem sagt "Nonni minn, nú gerðir þú þetta og þetta...hvað telur þú mig geta gert til þess að koma í veg fyrir að þessi hegðun endurtaki sig?" Amen!

Jæja yfir í allt annað...Köbenhavn! Já, aðeins vika í langþráða mæðgnaferð, og ég á meira að segja tíma í brúðarkjólamátun...spændende ;)

Skruppum í bæinn síðustu helgi, frá föst til sunn. Mikið span og þetta geri ég ekki aftur, a.m.k. verða þær systur eftir heima ef það á að stoppa svona stutt. Elín greyið ældi föstudagskvöld, hefur líklega orðið illt eftir langa bílferð, og fékk svo hita og vaknaði að meðaltali 20 sinnum á nóttu föst og lau. Við Óskar vorum sem sagt útkeyrð eftir helgina, en við hittum samt ættingja og vini, sem bjargaði þessu öllu saman. Fórum í veglega 3ja rétta afmælisveislu á Lækjarbrekku í hádeginu á lau, í tilefni 85 ára afmælis Lóló ömmu Óskars. Æðislegur matur og góður félagsskapur. Svo skrapp ég í 30 afmæli Evu vinkonu, sem skrapp á klakann frá Ameríkunni til þess að fagna tímamótunum með vinkonum og fjölskyldunni. Það var auðvitað æðislegt að hitta hana, þó stutt væri. Takk fyrir mig!!

Svo er það bara helgin framundan, þar sem planið er að Óskar fari á rjúpu. Best að gefa honum allan þann tíma sem hann þarf til að sinna því áhugamáli, því ég er að fara til Köben...liggaliggalái:)

Jæja, Dagmar var að kalla mömmu sína illum nöfnum..best að spyrja hana hvað ég eigi að gera til að koma í veg fyrir að þetta komi fyrir aftur! Kannski púsla eða eitthvað...

Kv, Íris agastjóri

Ný borgarstjórn!

2007-10-17T07:58:00.000-07:00

Nei bara grín, ég ætla sko ekki að tjá mig um það mál, nóg er gert að því á öllum öðrum stöðum. Vona bara að ný borgarstjórn komi með einhverja góða lausn á leikskólavandanum. Læt þar við sitja!

Var að fá fréttir af nýjum fjölskyldumeðlimi, en hún Anna Marín frænka mín var að eignast frumburðinn í dag 17. okt, og fæddi stelpu. Ætla heldur betur að máta þá litlu þegar við mamma skreppum til Köben í nóv.
Okkur Óskari finnst við alltaf eiga svolítið í henni Önnu Marín, því við þrjú bjuggum saman á tímabili þegar við Skari vorum í FÁ. AM var þá í 10. bekk og mamma hennar nýflutt til Skagen. Þetta voru nokkrir mánuðir á Bergstaðastræti, í frábærri íbúð sem mamma hennar átti. Við Óskar vorum soddan hjón að okkur var treyst fyrir unglingnum :) Það var mikið spilað, man að rommý var einna vinsælast, vorum eiginlega orðin spilafíklar. Þannig að, í ljósi þessa órjúfanlegu tengsla, á ég auðvitað von á að daman verði skírð í höfuðið á okkur...Íris Ósk...Heiður Ósk...eða bara Íris Heiður :)....já, eða kannski bara e-ð allt allt annað, en þá fer hún af brúðkaupsgestalistanum for sure!

Við Elín Ósk ætlum að skreppa í bæinn á morgun með flugi, bara rétt til að láta sérfræðing kíkja í eyrun á henni og svo heim aftur. Sem betur fer er jafnþrýstibúnaður í vélinni, þannig að minni líkur eru á að hljóðhimnan springi, en hún er víst útþanin öðru megin a.m.k. Með fullri virðingu fyrir heimilislæknum, þá segir fyrri reynsla okkur á eyrnabólgu það að fara bara beint til sérfræðings. Einn sagði t.d. að Dagmar væri bara með smá roða...hmmm já ok, en viku seinna sagði annar að hún væri með mikla eyrnabólgu, sem væri búin að vera lengi 3-4 vikur og Dagmar greyið með rétt um 50% heyrn. Tökum þ.a.l. enga sénsa!

Nóg í bili,
Íris

Away from home...

2007-10-09T16:06:00.000-07:00

Já það voru fá viðbrögðin við alvarlegu innleggi síðast... enda kannski ekki furða!

En núna er húsmóðirin í RVK, búin að vera heila 6 daga og 2 eftir. Það er ansi langur tími og ég get ekki annað en viðurkennt hve mikið rosalega ég sakna stelpnanna og Óskars...maður kann ekki að vera svona einn lengur...a.m.k. ekki svona lengi. Það er reyndar búið að vera mjög gaman og ég hef hitt marga, sem er frábært. Skellti mér á djamm með Ingibjörgu sys, og ég hef ekki fengið mér í glas frá því í mars 2006 Ó JÁ.. og ég fór kannski heldur geyst af stað..hehe..rauðvín, hvítvín, bjór, kokteilar og tequila...úff! Ég leið líka fyrir þessa blöndu daginn eftir..OJ
Nú verð ég að fara að læra...en mikið hlakka ég til að komast heim til fjölskyldunnar, í kyrrðina og rólegheitin..ahhhhhh..
over, Íris

Grimmur heimur

2007-10-02T02:53:00.000-07:00

Verð bara að tjá mig um þann viðbjóð sem ég sá í sjónvarpinu áðan. Ætlaði að setjast niður og horfa á hinn heimsfræga Dr. Phil, en eftir að hafa séð introið, var ég fljót að slökkva á imbanum. Viðfangsefni þáttarins að þessu sinni var "Can you trust your nanny"? Myndbandsupptökur sýndu að sumum þeirra er greinilega langt frá því að vera treystandi, því börnunum var misþyrmt grimmilega. Mikið svakalega er til margt ruglað og grimmt fólk í heiminum. Vildi að heimurinn væri án ofbeldis, og vildi að ég hefði aldrei séð byrjunina á þættinum.
Blessuð börnin....snökt snökt..

Bryllup

2007-09-25T06:17:00.000-07:00

Long time ago!!
Það er búið að vera ansi mikið að gera undanfarið, þá sérstaklega í náminu. En þar sem ég var svo asskoti dugleg í morgun, þá ákvað ég að nú skyldi ég henda inn einni færslu og hvíla heilabúið í smá tíma.
Brúðkaupið verður 28. júní á næsta ári, þannig að þið sem búið i udlandet, getið farið að plana heimferð þá helgi a.m.k. Er búin að skoða trilljón billjónir kjóla á netinu, en ég hef ekki hugmynd um hvað ég á að gera, hvaða snið klæðir mig, hvort hann eigi að vera með ermum eða ermalaus, blúndu/ekki blúndu, V-hálsmáli, hlýralaus....og ég veit ekki hvað. Þannig að ef þið teljið ykkur þekkja mig vel og sjáið einmitt ekta "Írisarbrúðkaupskjól" á netinu, þá eru þær hugmyndir vel þegnar iris-hj@hotmail.com. Það væri reyndar mjög fyndið að sjá hvaða kjóll þið haldið að sé "ég".
Svo fer að styttast í næstu staðlotu í skólanum, og ég þarf meira að segja að vera lengur núna en í fyrra skiptið, heila 9 daga!!! Það er mjög mikið þegar maður er án grislinganna og mannsins...spurning um að vera bara hrikalega dugleg að læra svo tíminn fljúgi áfram. Annars er ég búin að ákveða að það verði sofið út einn morguninn, því það tókst ekki síðast. Ég SKAL sofa út núna!!
Annars er það að frétta af skottunum að Elín Ósk er byrjuð hjá dagmömmu. Ég hélt það myndi ekki takast því aðlögunin fór ekki vel af stað og tók langan tíma. En núna er hún hin ánægðasta og hefur félagsskap af einum 11 mán gutta. Hann ákvað meira að segja að byrja að skríða svo hann gæti veitt Elínu eftirför, en hún er all over the place þessa dagana, tekur stigann eins og ekkert sé. Elskulega dagmamman hefur boðið okkur að hafa Elínu hjá sér lengur en vanalega þá viku sem ég er í burtu, svo Óskar þurfi ekki að taka sér mikið frí. Þvílíkur lúxus að hafa gott fólk í kringum sig.
Dagmar Lilja er bara í stuði og pælir enn mikið í útlitinu, og hefur ennþá miklar áhyggjur af því hvort hún líti nógu vel út fyrir Júlíus og Björgvin. Ætlaði sko ekki í grænum bol í leikskólann í morgun því J & B þætti hann ekki fallegur, en ég náði að sannfæra hana um það að þeir hefðu einmitt sagt mér um daginn að þeim þætti grænn svo rosalega flottur. OK þá! Annars er "Ó mæ god" algengur frasi hjá skvísunni, lágmark sagt 20x á dag :)
Jæja, best að læra aðeins meira, úr því fröken Elín er sofnuð.
Kærar kveðjur úr sveitinni :)

Áááái....

2007-09-13T14:48:00.000-07:00

Já það er ekki tekið út með sældinni að vera ég þessa dagana. Nú er "come back" í ræktinni, búin að fara 2x í þessari viku, í bodupump og bodystep! Það er yndislegt að finna LOKSINS aftur fyrir þessum vöðvum mínum, sem hafa legið í dvala svo lengi, en mikið er það rosalega sárt. Get varla haldið á Elínu fyrir harðsperrum...OMG!! Þetta eru frábærir tímar hjá henni Kollu vinkonu, og meðalaldurinn er örugglega 45 ára, sem er frábært! EN.... hvar eru yngri stelpurnar?? Sorry to say, en ég held að ef við vigtuðum allar stelpurnar á Höfn á aldrinum 25-35 , þá fengjum við meðaltal LANGT yfir kjörþyngd (og þá meina ég langt)! Ég er ekki að segja að allir eigi að vera flottir og fitt, en þegar þetta er komið út í öfgar þá er mér nóg boðið, svona ungar stelpur.
Annars gengur lífið sinn vanagang hér hjá okkur, Elín að jafna sig á eyrnabólgu og tönnunum fjölgar bara. Dagmar Lilja er ennþá með unglingaveikina hina fyrri. Fyrir utan æðisköstin, þá er útlitið allt í einu orðið svakalegt atriði, sagði meira að segja við Óskar einn morguninn þegar verið var að velja föt fyrir leikskólann: "Pabbi, ég vil ekki að Björgvin sjái mig í þessum buxum!" Jájá...einmitt...þú ert 3ja ekki 13!!!!
Over....Íris (90-60-90) hehe..

úff.....

2007-09-03T14:19:00.000-07:00

Þá er ég komin heim úr borginni. Hitti auðvitað helling og hitti líka EKKI helling, en svona er það bara. Það er nú meiri lúxusinn að koma í svona borgarferð, manni er boðið í mat nánast alla daga og frí gisting. TAKK fyrir mig...you know who you are!!:)
Ég hélt ég gæti ekki komið mér yfir pípuhliðið, svo erfitt var að fara frá litlu snúllunum mínum. Það er nú meira hvað maður er ótrúlega háður þeim. Svo var ég extra viðkvæm þar sem ég var að hætta með Elínu á brjósti og ég sakna þess ekkert smá. En þessi elska er svo mögnuð og var rosalega góð. Óskar er líka einstaklega laginn og hún þekkir pabba sinn vel, þar sem hann er búinn að vera í barneignaleyfi í 1 1/2 mánuð. Skólinn er byrjaður á fullu og ég vona að ég hafi þetta. Sem betur fer er bara próf í 1 áfanga, en það þýðir jafnframt að ég verð að vinna jafnt og þétt alla önnina og skila mörgum verkefnum, en ég geri hvað sem er fyrir að losna við próf!! Titillinn á þessu innleggi vísar til þess ástands sem nú ríkir á mínu heimili...eyrnabólga!!! Já hún Elín mín komin með þennan fjanda, hvað er málið með eyrnabólgu og íslensk börn?? Það hefur því verið lítið sofið (vægast sagt) síðustu daga. En það er gott að fá það á hreint hvað er að hrjá litla skinnið og bæta ástandið asap!!
Var boðið að vera með í föndurklúbbi...nú er bara að leggja höfuðið í bleyti og finna uppá einhverju sniðugu að gera....er ekki prjónatýpan því miður!!
Lifið heil kæru vinir :):)

Veggfóður, Köben, skóli......

2007-08-16T15:40:00.000-07:00

Jæja, þá er maður orðinn árinu eldri & ég tel mig ekki breytta á neinn hátt, a.m.k. ekki orðin "kelling" ...ennþá...hjúkk!! Að tilefni dagsins var velútvöldum vinum & fjölskyldumeðlimum boðið í kaffisamsæti (soldið kellingalegt..eða?) sem var bara fínt. Óskar lét ekki sjá sig þar sem hann var í fjallgöngu með öðrum göngugörpum. En hann færði mér þennann líka flotta útivistarfatnað, sem ég er hæstánægð með. Hann klikkar ekki...sko Óskar!
Annars ætluðum við "hjónin" að ráðast í veggfóðrun í fyrsta sinn á ævinni & eftir þessa heiðarlegu tilraun, lítur allt út fyrir að þetta hafi einnig verið okkar síðasta. Já, maður er ekki fæddur til að veggfóðra, það er nokkuð ljóst..en flest annað auðvitað :)
Svo styttist óðum í að alvara lífsins taki við að nýju, já skólinn bara að byrja eftir rúma viku. Þá fer ég keyrandi til höfuðborgarinnar & verð í 5 daga "orlofi", þ.e. húsmæðraorlofi. Þá verður sú styttri bara að gjöra svo vel að sætta sig við að hætta á brjósti fyrir fullt & allt, en eins & það er frábært að fá það frelsi á ný, þá mun stór partur af mér sakna þess, þetta er svo kósý! Ég verð í 10 einingum í haust & ég verð bara að játa það að ég kvíði svolítið náminu, aðallega vegna þess hve hún Elín mín sefur lítið á daginn. Spurning um hvort hún skreppi ekki til dagmömmu 2-3 skipti í viku 2-3 tíma í senn, svo ég geti afrekað eitthvað smá. Hún er líka svo mikil mömmustelpa, að ég held við hefðum báðar gott af þessu, svo finnst henni fátt skemmtilegra en að vera umkringd krökkum & börnum, þá er sko stuð!
En ég hlakka voða mikið til að hitta vinkonur mínar, ömmu & fleira fólk sem mér þykir vænt um & sakna að hafa nálægt mér.
Við mamma ætlum svo að lyfta okkur aðeins upp í vetur, nánar tiltekið í nóvember & skella okkur til Köben, en sú borg er í miklu uppáhaldi hjá mér & reyndar henni líka. Finnst eins & ég sé komin heim þegar ég er þarna, enda farin að kunna ansi vel á pleisið & svo er íbúðin hennar Mæju svo frábær & alveg niðrí bæ. Þannig að það gerist ekki betra. Kannski maður kíki á nokkra brúðarkjóla í leiðinni..hmm.. Talandi um það, þá er 12. júlí ekki alveg niðurnegld dagsetning, þið verðið bara að bíða spennt eftir frekari upplýsingum.
Jæja, best að kíkja á draugaþáttinn á Discovery...úúhhhhh...læt þetta því nægja að sinni.
Hafðið það gott þangað til næst...

Ertu kelling!!!??

2007-08-06T14:33:00.000-07:00

Þá er ágústmánuður hafinn...eru virkilega 7 mánuðir síðan Elín Ósk kom í heiminn??!! Þetta er svo furðulegt með tímann, hvað hann getur liðið hratt, en samt eldist maður ekkert, þið hljótið að kannast við þessa tilfinningu:) En ég hef sannfærst um það, að það erum við sjálf sem ráðum því hvort við eldumst eða ekki. Við ráðum því hvort við verðum "kellingar" fyrir aldur fram & klæðum okkur í takt við það. Það þekkja allir einhverjar ungar stelpur sem eru að drepast úr, að mér finnst, leiðindum. Þó við séum orðin foreldrar & þurfum að haga okkur samkvæmt því, vera fyrirmyndir barnanna okkar o.s.frv., þá megum við ekki gleyma að djóka & leyfa okkur að vera við sjálf. Það geri ég a.m.k. & mun gera áfram. Þoli ekki ungar stelpur sem eru orðnar of fullorðnar (inní sér) til að djóka & fíflast. Það er einfaldlega leiðinlegur félagsskapur! Hef ekki hugmynd um afhverju ég fór að blaðra um þetta núna, ætlaði bara að skrifa um eitthvað annað, en svo kom þetta.... kannski það sé vegna þess a nú eru 7 dagar í að ég verð árinu eldri.....Ég SKAL ekki verða kelling!!!!
hehe.... over..

Það þarf svo lítið....

2007-07-27T13:39:00.000-07:00

Þið sem hafið eignast börn þekkið hve ótrúlega ómissandi maður er á meðan barnið er á brjósti. Það er varla hægt að skreppa frá lengur en 2-3 klst í senn, annars er allt vitlaust! A.m.k. er það þannig í mínu tilfelli, því hún Elín mín ELSKAR brjóstið meira en allt annað. Núna er hún aðeins farin að borða grauta & ávaxtamauk, en hún fær samt sjússinn sinn nokkrum sinnum á dag & sérstaklega er hann mikilvægur fyrir svefninn. Eftir að hún er sofnuð á kvöldin, milli 19 & 20, þá tekur Óskar við vaktinni með stoðmjólk í glasi, just in case. Nú er ég s.s. að minnka bróstagjöfina & bara það að vera laus á kvöldin er ÆÐI!! Þessi elska var farin að vakna 4-6 sinnum á nóttu til að hafa það kósý hvort sem hún var svöng eða ekki, & skapið mitt var eftir því daginn eftir :/ Við fluttum hana í sitt eigið herbergi & síðan þá hafa allir sofið miklu betur...hallelúja! Hún var að vakna eflaust við hroturnar & bylturnar okkar, & ég vaknaði við minnstu hljóð í henni...þannig að ég mæli með þessu eins snemma & foreldrar treysta sér í þennan aðskilnað :) Að þurfa ekki að gefa henni í 12 klst er þvílíkur lúxus að það hálfa væri nóg, & hélt ég uppá það s.l. þriðjudagskvöld með einu glasi af mjög góðu hvítvíni...mmmm...kannski maður fái sér annað í kvöld!
Næsta helgi er heldur betur viðburðarík hér í bræðslubænum Höfn, því hingað flykkjast hópar af ungu afreksfólki í íþróttum, þjálfurum & foreldrum. Bærinn verður s.s. fullur af fólki, sem er frábær tilbreyting um Verslunarmannahelgina, þar sem fólk er annars vant að fara eitthvert annað. Að því tilefni skaut pabbi því að mér að ég mætti alveg vinna hjá honum í Nettó þá helgi, þar sem það verður brjálað að gera & opið lengur en vanalega. Ég , sem er búin að vera svona ómissandi heimavið, en að verða aðeins frjálsari, tók þessari bón hans fegins hendi & get ekki beðið eftir að fara að vinna. Auðvitað er húsmóðurhlutverkið mjög krefjandi & full vinna, en þetta er samt allt öðruvísi. Bara það að komast aðeins í annað umhverfi, þó það verði mjólkurkælirinn eða við búðarkassann, verður þvílíkt gaman..jeij!! hehe..skiljiði mig!?
Já, það þarf ekki mikið til að gleðja mitt litla hjarta..Nettó here I come!!hehe..
Hafið það gott elskurnar...

Íris garðyrkjufræðingur to be!

2007-07-15T15:09:00.000-07:00

Jæja gott fólk, best að láta aðeins vita af sér, þótt ekki sé um nein stórtíðindi að ræða. Garðurinn var til umræðu hér síðast & gengur bara þokkalega að rífa burt illgresi, vökva & slá. Fékk hjálp í dag frá mömmu & varð voða fegin að heyra hana segjast ætla að koma aftur í beðin..allir velkomnir:) Hún Ragna mín var ekki alveg að skilja ánægju mína með garðvinnuna, enda er hún borgarbarn & býr líka á Seltjarnarnesinu, þar sem er alltaf ROK, & því leiðinlegt að vinna í garðinum í slíku veðri..hehehe..kannski maður skíri eins & eina plöntu í garðinum í höfuðið á henni, einhverja sem er svolítið erfitt að eiga við:):) Og svo ég slútti þessu garðatali, í bili a.m.k. þá náði ég mér í stóru garðabókina, svo ég viti kannski e-ð pínulítið um garða!
Ég hef alltaf litið á mig sem mikinn dýravin, þó ég eigi engin dýr sjálf, en þau kvikindi sem maður rekst á í garðinum (get ekki slitið mig frá því umræðuefni) eru síður en svo í uppáhaldi. Ég kála öllum þeim köngurlóm sem ég sé með garðverkfærunum.. Sorry...en ég ÞOLI ekki þessi kvikindi!
Annars sakna ég sólarinnar á Höfn, sérstaklega þegar fréttir af bongóblíðu úr Reykjavík heyrast dag eftir dag. Hér var fínasta veður í júní, en það er alltaf þessi gola eftir hádegi, nánast á slaginu 12, sem við ætlum ekki að losna við. Ég verð bara að trúa því að afmælismánuðurinn góði bjargi sumrinu hér í sveitinni.
Við bíðum svo spennt eftir öllum ferðalöngunum sem ætla að leggja suð-austurland undir fót & bjóða þeim öllum í kaffi & meðí (líklega úr bakaríinu, nema einhver kenni mér að baka..en það er umræðuefni í langan pistil) eða jafnvel humar. En von er á fjölskyldumeðlimum & öðrum vinum næstu daga, gaman gaman!
Kveð ykkur að sinni & minni á að kvitta, það er svo gaman:) Koma svo!!!

Skrúðgarðurinn mikli!

2007-07-10T01:38:00.001-07:00

Þar sem okkar yndislega húsi fylgir stór & mikill garður, þýðir víst lítið að sitja inni á kvöldin & glápa á imbann. Mín lagðist á fjórar þegar skotturnar voru sofnaðar í gær & beint í beðin. Því miður er ALLT of mikið af þeim, þannig að það sem ég afrekaði þessa kvöldstund má helst líkja við krækiber í helvíti, svo mikið er eftir...:( Reyndar kemur mér gríðarlega á óvart hversu mikið ég fæ út úr þessari garðvinnu, mér finnst fátt eins notalegt & hlusta á kyrrðina í góðu veðri að kvöldi & róta í arfanum. Ég man vel hvað mér þótti þetta hrikalega leiðinlegt hérna áður fyrr, en þá átti ég ekki garðinn sjálf, & svo er það bara þessi yndilega ró sem færist yfir mann sem ég elska, þar sem lítið er að henni svona dags daglega með eina sem er með 3ja ára veikina á mjög háu stigi & svo hina litlu sem heitir ekki Elín Ósk fyrir ekki neitt!!
Við höfum reyndar tekið þá ákvörðun að fækka beðunum verulega & einfalda þetta (ó)skipulag. Við höfum engan tíma fyrir svona mikla arfavinnu!
En yfir til ykkar!!
Íris með græna fingur

Aðstoð óskast!!!!!

2007-07-06T16:36:00.000-07:00

Helló alle sammen!
Þannig er mál með vexti að aulanum mér, tókst einhvernveginn að klúðra leyniorðinu mínu á hotmailinu mínu. Allt í einu vildi það ekki leyniorðið og ég er búin að vera í vandræðum síðan & reyna allan andsk... en ekkert hefur gengið. Því er ég núna komin með nýja hotmail adressu sem er iris-hj@hotmail.com. Nú var ég með alla mína kontakta (sem eru auðvitað rosalega margir:) á gamla mailinu, og ég er ekki með eina hræðu á msn-inu mínu, því auðvitað man ég ekki eina einustu e-mail adressu hjá vinum og kunningjum. Viljiði vera svo yndisleg að bæta mér inn á msn-ið ykkar svo ég geti nú spjallað & sent ykkur mail??!! Kennó gengið er líka vinsamlegast beðið um að láta boðin berast þeirra á milli.

Annars er bara allt í gúddí og við bíðum spennt eftir að fá heimsóknir í sumar...jeij!!

Later..gater!

Sjóðheitar myndir!!

2007-07-03T14:02:00.001-07:00

Jæja gott fólk. Nýjar myndir komnar af börnum og búi á heimasíðu stelpnanna á barnalandi. Enjoy!!

Heima er BEST

2007-07-02T13:49:00.000-07:00

Loksins erum við flutt. Við sváfum fyrstu nóttina okkar á Mánabrautinni síðastliðna nótt & það var auðvitað bara æðislegt, & meira að segja hún Elín Ósk svaf til rúmlega 9, & það hefur ekki gerst í laaaangan tíma :)
Ég er búin að taka slatta af myndum til að sýna ykkur, en þar sem við erum ekki komin í net- né heimasímasamband, þá verð ég að bíða aðeins með að setja þær inn. Og þau ykkar sem hafa sent mér mail á hotmail adressuna mína, þá vill tölvan ekki samþykkja leyniorðið allt í einu, þannig að ég kemst ekki inn á póstinn eins og er, en það breytist þegar ég fæ mína tölvu í samband.
Hátíð á Höfn er nýafstaðin og við vorum nú frekar lítið í bænum, en kíktum auðvitað á sýninguna hans Hlyns, sem lukkaðist ekkert smá vel & hann seldi grimmt!! Langaði auðvitað í slatta af myndum eftir hann, en þar sem hann selur aðeins 3 eintök af hverri mynd, þá ákvað ég að leyfa áhugasömum kaupendum að ganga fyrir. Við Óskar ætlum samt að velja eina góða hjá honum & prenta jafnvel á striga.
Svo fékk ég óvænta heimsókn frá honum Binna Jósteins, en hann & Kristján flakka á milli bæja í sumar & selja "candyfloss" & sleikipinna. Dagmar fékk nokkra sleikjóa hjá þeim & var hin ánægðasta :) Alltaf gaman að hitta fólk svona óvænt!
Jæja, ég ætla að slútta þessum pistli, skrapp bara í tölvuna hjá tengdó á meðan ég þvæ nokkrar spjarir, en þvottahúsið er ekki alveg reddí að svo stöddu.
Later alle sammen!!

Hátíð í bæ!!

2007-06-25T04:23:00.000-07:00

Þá er að koma að því að við fjölskyldan flytjum á Mánabrautina, JúHÚÚÚ!!! Eftir langt og strangt vinnuferli erum við byrjuð að þrífa (sem er jú líka mikil vinna), en það er bara svo gaman að sjá fyrir endan á þessu. En VÁ hvað er rosalega skítugt! Það er s.s. hátíð í bæ á Mánabrautinni, en svo er líka að koma að Humarhátíð...og spáin....rigning en ekki hvað! Það hefur ekki rignt hérna í 3 vikur eða lengur...bíð bara eftir skógareldum eins og þegar ég var hjá henni Evu minni í Borrego í 50 stiga hita....kannski ekki alveg jafn heitt...og ekki skógur nálægt...nú jæja....
Já það sem er mest spennandi við humarhátíðina að þessu sinni er fyrsta ljósmynda- og málverkasýning Hlynsa bró. Ég hvet auðvitað alla sem mögulega geta að láta sjá sig og skoða frábærar myndir. Ég hef mikla trú á honum Hlynsa mínum!
Alltaf þegar ég ætla að skrifa pistil þá lætur hún Elín Ósk eins og hún hafi hvorki fengið vott né þurrt í marga daga, þannig að ég læt þetta gott heita að sinni. Næsti pistill verður vonandi skrifaður á Mánabrautinni :) JEIJ!

Halló Hornafjörður!!

2007-06-20T10:54:00.000-07:00

Hæ öll sömul!
Mikið svakalega er gaman að fá comment frá ykkur...takk fyrir það kæru vinir :)
Hér gengur lífið sinn vanagang, sem þýðir að við erum ekki flutt...VÆL..en svona er það nú bara. Allt þetta smotterí tekur svo langan tíma, en það er ekki eins og við séum bundin við einhverja ákveðna tímasetningu, þetta hefst þegar þetta hefst.
Hér er bongóblíða og við stelpurnar erum úti bókstaflega alla daga, allan daginn. Ég vona bara að þetta verði svona í ALLT sumar.
Já svona í lokin (Elín Ósk farin að kalla ansi ákaft á mömmu sína:), þá verður bryllup 12. júlí 2008...og hana nú!!!

Lítil ástarsaga....:)

2007-06-13T01:27:00.000-07:00

Þá er það ákveðið! Næsta sumar verður brúðkaupið haldið á landi ísa, nánar tiltekið á Lækjarbrekku. Risa stórt veislutjald mun rísa þar, vonandi í bongóblíðu á íslenskan mælikvarða (má líka alveg vera á danskan, sænskan eða norskan mælikvarða.....anyway) og þar verður svo dansað & drukkið fram á morgun. Það þarf víst að fara að telja gestafjöldann & taka frá gistingu, því hér er ferðamannabransinn í miklum blóma, og þegar farið að bóka fyrir næsta ár. Er ekki betra þá að ákveða daginn?! Jú, líklega.
En það var fyrir tæpum 15 árum síðan að draumaprinsinn fannst, og á Höfn, af öllum stöðum. Það er alltaf þannig að þegar nýtt "kjöt" kemur í bæinn & fer á röltið, þá mætti halda að maður sé nakinn á röltinu...svo mikla athygli fær maður, flautað & gefið í eins og ég veit ekki hvað. En svona stælar hrifu mig alls ekki!!........svo kom 5. september & Elli Gull ákveður að halda upp á afmælið sitt heima hjá Óskari sem var einn heima. Ég fór í partýið og kom fljótt auga á rosalega sætan strák sem var e-ð að glamra á gítar, dökkhærður, með skipt í miðju, bláeygður með kringlótt gleraugu :)................ekkert gerðist þar, en svo var farið í annað partý. Fljótlega var Íris komin í fangið á Óskari sínum, en á þessum tíma var ég nýflutt frá Danmörku & var hrikalega dönsk í alla staði. Var léleg í íslensku & kunni ekki fullt af orðum, & stundum byrjaði ég bara að tala dönsku án þess að taka eftir því strax. Ástföngnu unglingarnir eru e-ð að knúsast í einum hægindastólnum í partýinu þegar Óskar segir e-ð á þessa leið:,,Mér finnst þú æðisleg & held ég sé hrifinn af þér....er það gagnkvæmt?" GAGNKVÆMT!!!!!! ALARM!!!! Hvað í andsk... þýðir GAGNKVÆMT???##$%"%" Íris hefur ekki hugmynd um hvort hún á að segja já eða nei, en verður að hugsa hratt, & finnst eftir smá pælingar orðið gagnkvæmt vera frekar neikvætt orð og segir því: ,,Nei!" Óskar verður frekar furðulegur á svipinn & sleppir höndunum sem annars héldu svo þéttingsfast utan um Írisi sína......Íris ákveður því að viðurkenna fávisku sína: ,,Hvað þýðir það annars?"
Já & svo vita flestir sem okkur þekkja framhaldið... ups & downs, en þó aðallega ups. 15 ár með stuttum hléum, yndislegar dætur, blússandi hamingja & bestu vinir...er þá ekki kominn tími til að ganga í hjónaband?!

Over...Íris den danske pige ;)

Ekki vandamálið !!

2007-06-07T13:32:00.000-07:00

Sæl veriði!
Hér gengur lífið sinn vanagang, en mikil spenna ríkir hjá The Óskar´s þar sem óðum styttist í flutninga...en nú er planið að flytja inn þarnæstu helgi. Óskar & Haffi byrja að parketleggja TV-holið á morgun og svo er bara harkan 6 áfram..máli máli lakki lakki.. Breytingarnar nú þegar eru ótrúlega miklar, sérstaklega þar sem sumarbústaðafílingurinn var hvað mestur (en stigaop + tv-hol var þakið panell sem var orðinn ansi gulur á litinn). Ég mun reyna að setja inn myndir þegar þetta verður allt orðið tipp topp!
Þegar við tókum þessa ákvörðun um að flytja hingað, var auðvitað nr. 1, 2 & 3 að hér væri vinnu að fá fyrir okkur skötuhjúin, og ég get sagt ykkur að það stenst alveg, því Óskar er ekki að vinna í húsinu okkar í kvöld heldur í sumarbústað upp í Lóni að pípuleggja!!!. Það er reyndar fjölskylduvinur sem er í vandræðum því hann fær ekki pípara, en hann hafði samt samband við einn fyrir 1 og 1/2 mánuði síðan, bara til að vera alveg "sjor" á því að það yrði ekkert vesen..... en auðvitað er enginn pípari laus. En mikið er ég fegin að ástandið sé svona en ekki á hinn veginn!
Við Elín Ósk skruppum í göngutúr á Sjómannadaginn, sem er nú ekki merkilegt, nema að ég mætti manni sem vildi endilega að ég færi bara að kenna strax í haust...hmmm??....og hvað?? Myndmennt!!!! Dæsus...ÉG..kann ekki að teikna Óla prik hvað þá meira. Það vantar s.s. myndmenntakennara hingað (og reyndar bara kennara almennt) til að kenna 1.-3. bekkingum. Hér með auglýsi ég eftir áhugasömum einstaklingum í þá stöðu. Drífið ykkur á Höfn kennaranemar :)..Ragna mín..þú hefðir gott af smá slökun..hehehe..
Jájá, en hún Elín mín ætlar að vera heima með mömmu fram að áramótum...og þá sé ég til!
Lifið heil....

Allt á fullu en samt svo næs :)

2007-06-03T16:24:00.000-07:00

Jájá, auðvitað varð ég að blogga eins og allt normalt fólk. Þessi stóra ákvörðun var endanlega tekin þar sem ég hef flúið stórborgina Reykjavík og komið mér fyrir á þeim merka stað Hornafirði, og mun þess vegna ekki hitta mína vini og vandamenn eins oft og ég gjarnan vildi.....gerir maður það nokkurn tímann??
Búslóðinni var hent á methraða inn í bílskúrinn (hans Óskars auðvitað) og í dag voru penslar, rúllur og aðrar nauðsynjar til málningarvinnu rifnar úr umbúðum og ermar uppbrettar enda 170 fm sem þarf að mála a.m.k. 2 - 3 umferðir. Svo þarf að lakka, pússa og ýmislegt annað álíka skemmtilegt.
Dagmar Lilja (sem er með snemmbúna unglingaveiki, eða 3ja ára veikina) er byrjuð í aðlögun á Lönguhólum og gengur bara vel. Hún er mikil félagsvera þessi elska og leiðist að hanga með mömmu og litlu systur daginn út & inn, hún vill action!! En hún er jafnframt viðkvæm sál og við vonum að hún verði áfram svona dugleg!
Junior er með ótrúlegt jafnaðargeð og er að taka tennur. Það sást glitta í þá fyrstu bara í dag og sú stutta 5 mánaða á morgun.
Það er s.s. allt á fullu, en samt er þetta allt öðruvísi dagar en í henni Reykjavíkinni. Ég er t.d. ekki nema 5 mín að labba í nýja húsið frá tengdó, þarf ekki að hafa áhyggjur af Dagmar og umferðinni, verð ekki vör við hurðaskelli, fulla kerlingu né bílflautur allan sólarhringinn.. og hér er hægt að "skreppa" í heimsókn..það tekur lágmark 1 og 1/2 klst í RVK.
Já, þið ættuð því að skynja ánægju mína með það að vera komin með dæturnar (og kallinn:) í rólegheitin. Ég mæli með þessu ef þið mögulega hafið kost á!!
Over & out...